Rakhe ia ka Azadi Ka Amrit Mahotsav ha Mairang
Kum shibynta ban rakhe iaka Azadi Ka Amrit Mahotsav ne ka jingrakhe iaka jingdap 75 snem jong ka jingioh laitluid ka Ri India, ka ophis jong u District Sports Officer, West Khasi Hills District ha ryngkat ka jingiatreilang bad ka ophis u Sub-Divisional Officer (Civil) Mairang Civil Sub-Division, Mairang bad ka District Sports Promotion Society, West Khasi Hills District kila pynlong iaka jinglehkai skit jong ka Seng Biria Dei Por (SBDP) kaba iathuh shaphang ka jingialeh laitluid u Syiem Tirot Sing pyrshah ia ka sorkar phareng ha ka prokram kaba la pynlong ha Madan Mot Tirot, Mairang Mission, Mairang.
U Syiem ka Hima Nongkhlaw, u Pa’iem P.M Syiemlieh u la wan kum u kongsan ha kane ka prokram ha ka jingdon ryngkat u Additional Deputy Commissioner ba dei peit ia ka Mairang Civil Sub-Division, u Bah A. Nongbri, u Block Development Officer ka Mairang C&RD Block, u Bah V. Swer, u District Sports Officer ka West Khasi Hills District, u Bah P.B Nongbri, u Syiem Khynnah ka Hima Nongkhlaw, u Bah K. M Syiemlieh, ki Sordar Shnong ka thain bad kiwei de.
Ha ka jingkren lyngkot ka jong u, u Syiem ka Hima Nongkhlaw, u Pa’iem P.M Syiemlieh u la ong ba ka jingrakhe ia ka Azadi Ka Amrit Mahotsav ka long ka kabu ia ka ri India baroh kawei ban aiburom ia kiba bun ki riewialeh laitluid jong ka kiba kynthup ia u Tirot Sing Syiem uba iai bteng ban pynshlur ia ki pateng haduh mynta mynne lyngba ka jingshlur, jinglenlade bad jingieid jong u iala ka ri ka jaka ha ka jingialeh laitluid jong u pyrshah ia ka sorkar phareng.
U Pa’iem P.M Syiemlieh u la pynpaw ruh ba u kyrmen ba kane ka jingrakhe kan ai mynsiem ia ki nongshongshnong ban bud ia ki dienjat jong u khla ka wait, U Tirot Sing Syiem bad kumjuh kiwei pat ki riewshlur ialeh laitluid ka ri India kiba la iakhun bad kiba la pha ruh iala ka jingim na ka bynta ka jinglaitluid jongngi mynta.
La ioh ruh ban sakhi ia ka jingrwai ba la rwai da I Kong Ugene Mary Mairom.
Shuh shuh iaka Cyclothon Rally ha shnong Mairang la pynlong haka 13 tarik bad la kaweh iaka lama da u Syiem Khynnah ka Hima Nongkhlaw, u Bah K.M Syiemlieh ha Madan Mot Tirot, Mairang Mission, Mairang ha ka jingdon ryngkat u Additional Deputy Commissioner ba dei peit ia ka Mairang Civil Sub-Division, u Bah A. Nongbri bad u District Sports Officer, West Khasi Hills District, u Bah P.B War Nongbri.
Kane ka jingniah cylce kalong 3.8 kilometer na Madan Mot Tirot, Mairang Mission lyngba ka Tirot Sing Memorial College, Mairang, ka Shnong Mairangbah, Shnong Pyndengumiong bad la pynkut pat ha ka jaka ha kaba la sdang ia ka, kata, ha Madan Mot Tirot, Mairang Mission.
Facebook
Instagram
Youtube
Twitter
Leave a Reply