Rakhe iaka sngi kyrpang ban iada naka jingpynkut jubor iaka jingim ha East Jaintia Hills

Syllad | The Rising MeghalayaSeptember 9, 2023

Shi bynta ka jingrakhe ia ka “World Suicide Prevention Day” ne ka sngi ban iada na ka jingpynkut iala ka jong ka jingim, na ka liang ka SANKER, Shillong mynta ka sngi Saitjain ka la pynlong da ka jingiamir jingmut paidbah halor kane ka mat ha ka prokram ba la pynlong hapoh Auditorium jong ka Don Bosco College, Byndihati, East Jaintia Hills District

La iadonlang u Dr. S Syiem, Director, SANKER, Shillong, u Principal, Don Bosco College, Byndihati, u Fr. George S Lyngkhoi, District Medical and Health Officer, East Jaintia Hills District, Dr. D Shylla, Director, Ephphatha Society, Rev. ES Sapuh, ki nonghikai, ki khynnah skul bad kiwei kiwei.

U Dr S Syiem u la pynpaw ba ki briew kiba pyrshang ban shim iala ka jingim ki donkam ia ka jingiarap bad dei ban don ia ka jingshlur ban iarap ia kiba kum kine ki briew khnang ban pynshlur ia ki ba kin lah ban iakhun ia ka thma jong ka jingim kaba shakhmat.

Nalor kata u la kren ruh halor ka mat kaba iadei bad ka jingshah banbor jong ki khynnah da kaba ong ba ki khynnah kiba ngat ha kiba kum kine ki jingshah lehbor ki lah ban shim ia ki sienjam ban pynkut iala ka jong ka jingim katba ki nang heh nang san.

Ha kane ka sngi u Dr Syiem u la kren ruh halor ka mat kaba sngew bynniaw kiba la jia ha kylleng ka pyrthei ha kaba ki briew kiba la kham noh ha ka rta ki ju pynkut noh iala ka jingim, kata lehse namar ka jingshah iehnoh bein ha la ki jong ki khun ki kti lane namar ka jingbym lah shuh ban trei ban ktah namar ka rta kaba la noh arsut.

Katba u Principal ka  Don Bosco College, Byndihati, u Fr. George S Lyngkhoi ha ka jingkren u la pynpaw ba ki briew kiba pyrshang ban shim iala ka jingim ki dei kito kiba la shah ktah ha ka jinglong ha ka met ka phad bad ka bor pyrkhat pyrdain, bad dei ban sngewthuh ba kiba kum kine ki briew ki donkam ia ka jingiasyllok. Ha kajuh ka por u la ai ruh ka jingkhublei ia ka SANKER halor ka jingpynlong ia kane ka prokram kaba long ka rynsan ban ialap paidbah halor ki sienjam ban khanglad ia kiba kum kine ki jingjia.

Na ka liang u Dr D Shylla, District Medical and Health Officer, East Jaintia Hills District u la kren ha kaba iadei bad ki jingshitom kiba ktah ia ka bor pyrkhat pyrdain bad ki jingktah ia ka imlang ka sahlang da kaba pynpaw ruh ba ia kine ki jait jingshitom lah ban iada lyngba ka jingkyrshan da ka imlang ka sahlang khamtam da ki dkhot ka longiing jong kito ki briew kiba shah ktah.

Hadien kane ka jingialang ka la don ruh ka jingiamir jingmut paidbah hapoh ka jingialam District Medical and Health Officer, East Jaintia Hills District, Dr. D Shylla.

Shuh shuh shwa kane, shibynta ban ialap paidbah halor kane ka mat, la pynlong ia ka ‘Cycle Rally kaba la sdang napoh Don Bosco College, Byndihati shapoh Good Shepherd Secondary School, Ladrymbai bad wanphai biang sha Don Bosco College.