Rakhe International Women’s Day ha Jowai: La kren halor ki lad jingiada bad ka jingmyntoi ki kynthei

Syllad | The Rising MeghalayaMarch 7, 2025

Ka District Social Welfare Officer ryngkat ka jingiatreilang bad ka District Sankalp Hub for Empowerment of Women (DHEW), West Jaintia Hills District, Jowai kala rakhe iaka sngi nternational Women’s Day halor ka phang “For All Women and Girls: Rights, Equality, Empowerment.”

Iaka jingialang la pynlong hapoh District Library Auditorium, Mynthong, Jowai haka 7 tarik Lber. Kane ka jingïalang ka la rakhe ruh ïa ka jingdap 10 snem ka Beti Bachao Beti Padhao (BBBP) kaba thmu ban kyntiew bad pynkupbor ïa ki khynnah kynthei lyngba ka jingnang jingstad kaba mar ïaryngkat ki shynrang bad kynthei.

Ka Kong DV Lyngdoh, MCS, u Additional Superintendent of Police u Ishaan Gupta, IPS, u Resource person ka Ka kong I Warjri Assistant Director ka Good Governance Cell ka Meghalaya Administrative Training Institute, Shillong, ka Kong Y Najiar District Social Welfare cum District Nodal Officer ka DHEW, Jowai ruh kila donlang ha kane ka sngi.

Haba ai jingkren shaki paidbah ka Kong DV Lyngdoh ka la ban jur ba ka jingnang jingstad ka long kaba donkam ban pynkupbor iaki kynthei namar kadei ka atiar kaba khlaiñ tam, ban iada na kino kino ki jingeh bad jingshah ban bein ne leh bein. Hynrei kala pynkynmaw ruh ka jingnang jingstad ba pura kam mut tang ban ioh ki kyrdan pule bapher bapher, hynrei ban kiew ruh ha ka akor ka burom bad ka longbriew ka manbriew.

Kala ban khia ruh iaki kmie ki kpa ban nym ailad iaki khun ki jong ki la kidei ki kynthei ne shynrang ban pep skul shiteng por namar kane kan ktah ia ka lawei ka jong ki.

U Additional Superintendent of Police u Ishaan Gupta haka jingkren ula pynpaw ba la kha ia u ha ka jylla kaba ka jingsynshar ka iapher na ka jylla Meghalaya. U la iaroh ia ka jingkhlain bad jingkut jingmut jong ki kynthei hangne, da kaba kubur iaka jingnoh synniang jong ki ha ki kam bapher bapher, la ka long ha ki kam sorkar ne ha ka sain pyrthei. U la iaroh ruh ia ka jingiashim bynta shitrhem jong ki nongshong shnong ha ka roi ka par ha ka imlang sahlang, da kaba pynpaw ba kum kane ka jingiatylli niar bna iohi shawei pat ki jaka jong ka ri.

Nalorkata ula kyntu ruh ia baroh ban ai ka jingiatreilang bad kyrshan iwei iwei ha kano kano ka jaka kaba ka jingeh ka lah ban don bad ban wan shakhmat lada don kano kano ka jingeh kaba jia haka ki shnong ki thaw ne ki para marjan.

Katba ka riew shemphang ka Kong I Warjri ka la ai jingshai halor ki mat ba kongsan kiba iadei bad ka jingshngain jong ki kynthei, ka jingiada katkum ka ain bad ki skhim jingiarap jong ka sorkar. Ka la ban jur ia ka jingdonkam jong ka One Stop Centre (OSC) kaba long kum ka jaka ai jingkyrshan mardor ia ki kynthei kiba iakynduh ia ka jingshah thombor.

Ka OSC ka ai ia ki jingshakri kiba donkam kynthup iaka jingiarap haka liang ka koit ka khiah, ka jingiarap ha ka liang ka ain. Ka Warjri batai ruh halor ki skhim sorkar bapher bapher, kiba na ka liang ka sorkar pdeng bad sorkar jylla ki thmu ban pynkup bor iaki kynthei.

Kum shibynta jong kane ka jingrakhe la pynlong ruh ïa ka ‘Signature Campaign’ ban kuar ban pynduh iaka jingsngew iapher kynthei bad shynrang kaba la iashim bynta da u Additional Superintendent of Police Ishaan Gupta, IPS, ka Additional Deputy Commissioner ka Kong DV Lyngdoh, MCS, ki heh sorkar, ki samla pule, ki ophisar bad ki nongtrei jong ka District Social Welfare.

Nalor kata, la shim ruh ïaka jingkular kaba kular na ka bynta ka hok jong ki kynthei ba la ïalam da ka Kong L Ksoo Centre Center Manager cum Protection Officer One stop Centre.