Rakhe jubili rupa ka Newhill Lower Primary School Ratacherra

Syllad | The Rising MeghalayaDecember 16, 2023

Ka Newhill LP School Ratacherra kaba la seng naduh u snem 1998, haka 14 tarik Nohprah ka la rakhe iaka lyngkhuh dap 25 snem ka jingiaid lynti ban ai jingshakri iaki khynnah haka liang ka pule puthi.

Ia u maw sahnam jong ka jingdap 25 snem la wan ban plie da u MDC ka Narpuh u Ma Emlangki Lamare haka jingdonlang ka Block Mission Coordination East Jaintia Hills District ka Kong T. Challam, u MDC barim ka thain u Ma Decsous Pohshna, u Waheh Shnong u Ma Pynkhlain Dhar, u Ma Khamsngur Pohing Waheh Shnong barim, ki nonghikai ki khynnah skul bad kiwei kiwei ki riew rangbah ka Shnong.

Ha kane ka sngi la sam iaki jingai sngewbha sha ki nongseng, ki khynnah skul ba nyngkong, kumjuh sha ka nonghikai kaba nyngkong eh ka Kong Theiris Sumer bad kyrpang ia u Ma Wenly Pohshna kum u nongialam lynti iaki dkhot jong ka SMC.

Khyndiat shaphang ka Histri jong ka Newhill L.P School, Ratacherra, la sdang nyngkong iaka, ha ka por ba ka dong Newhill ka dang don tang khyndiat tylli ki tnum iing da ki 8 ngut ki rangbah kiba dei ki nongshong iing ba nyngkong eh jong kane ka dong.

Kine ki rangbah ki long u Ma Worly Pohing, (L) Philip Pohshna, Ma Promwill Sumer, (L) Slin Mukhim, (L) Diness Najiar, (L) Maiboi Mukhim, Ma Charles Mukhim bad (L) Yet Pohshna.

Ha kaba sdang eh kine ki rangbah ki ia kynduh shibun ki jingeh bad lyngkhom jingmut, khamtam haba ki dei tang ki briew ki bym pat don jingnang jingstad bad ruh kim dei kiba don ba em.

Ka jaka ban shna iing skul ruh kim pat ioh kumta kila pynlong skul noh ha iing u Ma Worly Pohing. Ka nonghikai kaba la iarap ban hikai nyngkong eh kadei ka Kong Theiris Sumer khlem kano kano ka jingsiew hynrei la shu burom iaka tang da kaba leit iarap wer kwai iaka shisien shisnem bad ki khynnah skul ha katei ka por ki dang don kumba 7 ngut eiei.

Hadien kane pat ki la leit wad jingiarap na u Ma Wenly Pohshna ba shong ba sah ha Umkiang bad u leit ialam ia ki sha ki bor ba halor kiba dei peit ia ka pule puthi, khamtam sha ophis Deputy Inspector of School Khliehriat Sub Division ba ha kito ki por ba dei peit da u Bah W. Lyngdoh.

Une u sahep ula wan jngoh ia ka skul bad ula ai jingbit iaki, kumta la shna da ka iingtrep ha ka nongrim iing jong ka Kong (L) Mukhim Rymbui bad iaka baje ban tied hashwa ban long skul la ai sngewbha da u Ma Charles Mukhim.

Katba kim pat ioh ka jaka kaba pura, ki la hap ban kynriah jaka na wei shawei kata ha nongrim iing jong ka Kong Mistina Pohthmi, Kong Pril Sumer bad Woh (L) Yet Pohshna bad khatduh ki shna iing trep ha ka jaka bam doh kutsnem jong ka dong.

Ha ka snem 2001 pat la ioh ban thung nonghikai da kaba kham don kyrdan ha ka jingsiew kaba 1000/- shibnai. Ha ka snem 2004 pat da ka jingiarap jong u Sahep W. Lyngdoh la ioh ban pynrung iaka nonghikai bad ka skul hapoh jong ka SSA Adhoc. Ha ka snem 2005 pat la ioh iaka Building Grant ba la ai da ka ophis jong ka Border Area bad la shna da ka iing Building haka jaka ba la shu thied na ka Kong Bless Manar.

La siew ia kane ka jaka da MLA barim u Ma Nehlang Lyngdoh. La thaw (form) ruh da ka School Managing Committee namar ba la nang kham bun ki nongshong shnong hapoh ka Dong.

Haduh mynta iaka skul la pyniaid hi da ka Managing Committee katkum ki kyndon ba la buh da ka Education Department. Kumba long mynta kane ka skul ka don 2 ngut ki nonghikai ba la siew da ka Sarva Shiksha Abhiyan (SSA) bad 2 ngut pat kiba la siew da ka Managing Committee. Katba ki khynnah skul ki don haduh 125 ngut kynthup lang iaki Pre-Primary Class haduh Class-V.

Kane ka skul ka la ioh ruh ia ka jaka kaba kham bit kham biang ha lum Diengjri Ratacherra ba la ai da ka shnong Ratacherra.