Rakhe ka ANKCYAS ia ka jingiaid lynti ba 25 snem ka jingiatylli ki riewngeit Naga bad ki Kuki ha Shillong

Syllad | The Rising MeghalayaApril 28, 2025

Ka All Naga Kuki Catholic Youth Association Shillong (ANKCYAS) haka 27 tarik Iaiong ka la ioh ban rakhe ia ka Jubili Rupa ha ka jingialang ba la pynlong hapoh St. Margaret’s Higher Secondary School, Peachlands, Laitumkhrah, Shillong.

Kane ka jingrakhe ka pynkynmaw ia ka jingiaid lynti kaba 25 snem jong ka jingiatylli bad ka jingiadei kaba jan hapdeng ki riewngeit kiba dei na ka jaidbynriew Naga bad ki Kuki bad kaba la khring ia kiba bun bah ki nongwan iashim bynta hapdeng ki riewngeit bad kiwei pat.

Ha kane ka sngi la ia don lang ruh u James K Sangma, Chairman ka Industrial Development Cooperation Meghalaya uba dei ruh u Myntri Sorkar barim kum u Kongsan uba ha ka jingkren u la ai ka jingiaroh ia ka jingiatylli kaba la pyni da ki samla Naga bad Kuki. U la kdew ruh ia ka jingitynnad jong ka Shillong kum ka iing kaba iasam lang hapdeng kiba bun ki jaidbynriew bad pyrto ia ka jingnoh synniang jong kiba kum kine ki seng sha ka kolshor bad ka imlang sahlang jong ka Jylla.

Ka prokram ha kane ka sngi ka la sdang naduh ka por 9:45 mynstep da ka jingrakhe Iukharist kaba la pyniaid da u Most Rev. Bernard Laloo DD, Auxiliary Bishop ka Shillong Archdiocese. Ha ka jingialap, u Bishop u la ban jur ia ka jingdonkam ban ainguh bad ban pynroi ia ka mynsiem jong ka jingsngewnguh, ka jingdon ia ka tynrai ha ka jingmap bad ka jingpyniasuk. U la kdew ba ka jingsngewnguh ka dei ka jingleh jong ka jingkhuid, ka jingiatylli kaba neh hapdeng ki jaidbynriew bapher bapher ka dei kaba pynpaw ia ka jingaiei ba kynja Blei.

Hadien ka Mass bakhuid la pynlong ia ka prokram kaba iphuh iphieng halor ka kolshor ha kaba la pyni ia ki jingrwai bad ki jingshad tynrai ba la iashim bynta da ki jaidbynriew ka Nagaland bad Manipur. Ka jinglong ba riewspah jong ka kolshor ka la pynpaw ia ka mynsiem jong ka seng ban kynthup lang bad ka jingburom markylliang.

U Fr. Thungbemo Paul, Chaplain ka ANKCYAS ha ka khubor jong u, u la pynpaw ia ka jingkordor jong kane ka sngi. “Haba phai sha ka histori jong ka jingiakynad hapdeng ki Naga bad ki Kuki, ka jingiadon ryngkat lang kaba 25 snem kam dei tang kaba phylla hynrei ka dei ka jingkyrkhu kaba kynja Blei,” u la ong da kaba ai khublei ia ka seng namar ka jinglong ka rynsan ba kyrpang ha kaba baroh artylli ki jaidbynriew ki ieng kawei ha ka jingngeit bad ka jinglong shipara.