Rakhe ka Balang Unitarian iaka lyngkhuh snem ba 137

Syllad | The Rising MeghalayaSeptember 19, 2024

Ka Balang Unitarian, Jowai ka la rakhe iaka lyngkhuh ba 137 snem ka jingwan ka niam Unitarian ha rilum Khasi-Jaintia haka 18 tarik Nailur. Ka phang pdeng ka long “Lynti ka niam U Blei ba pynhun Mynsiem”.

Shuwa ban sdang ki jingiaseng haka por mynstep la pyndeng syntiew ia u mot jong u nongseng ka Balang Unitarian u Babu Hajom Kissor Singh da ka Moderator Neinihiwot Passah bad pynher ruh iaka lama.

Haka nohphai sngi ka la don ka jingiaseng paidbah ba la pyniaid da u Moderator Kiki Pakma uba la thang ruh iaka sharak katba iaka khubor Anniversary la sam da u Rangbah Homeland Lamar.

U Rangbah Homeland Lamar haba sam iaka khubor Anniversary ula puson khyndiat shaphang u Babu Hajom Kissor Singh, la kha ia u haka 15 tarik Jylliew 1865 ha Saitsohpen, Cherrapunji.

U pule skul nongkong ha Sohra, hadien ula leit sha Shillong ban pyndep iaki jingpule kiba kham shajrong. Ha u snem 1880 la pynkylla niam ia u shaka niam Calvinist Methodist Christianity bad neh ha kane ka niam tang kumba saw snem.

U Babu Hajom Kissor Singh hadien ba ula ioh ban pule iaka Bible ula lap ba ki kyntien Lai ha Uwei kim shym don haka Bible. Kumta ula sdang ban wad bniah ban lap iaka jingshisha hynrei da ka jingiarap bad jingai mynsiem ki Missionary Unitarian ula ioh bor ban seng iaka niam Unitarian ha rilum Khasi Jaintia bad Karbi Anglong ryngkat ka jingsynrang iwei i longkmie Hirbon Lakadong, Kat Shylla bad Mar Sutnga kila seng ia kane ka niam mane Wei Blei haka 18 tarik Nailur 1887 ha Jowai.

Ula ong ha kane ka lyngkhuh snem kaba 137, ka jingngeit ka hikai ban ieid ia u briew bad ban ieid ia U Blei. U Blei u long tang uwei, U long ka kmie u kpa ba shisha bad ki bynriew baroh ki long shi para.

Haba kren halor ka phang “Lynti ka niam U Blei ba pynhun Mynsiem”, u Rangbah Homeland Lamar ula ong kadei ka jingtynjuh lang ia baroh, kano ka lynti ba ngi dei ban jied haka jingiaid lynti ka jong ngi. Ka lynti ka mon pyrthei ne ka lynti ka mon u Blei?

Ula ong, bunsien la iohi ba ka mon pyrthei ka long thik kum u maknet uba khlain bor ba lah ban tan bad pynngop shaka jingbakla bad jingthala, hynrei ynda la kyndit bynriew ka ktik pat ban phai bad iasyllok bad U Blei.

U Rangbah Lamar ula khot iaki riewngeit ban long kiba sngewthuh iala ka longbriew man briew khnang ban lait na kino kino ki jingiakynad, jingiaumsnam, jingiashun ia bishni, jingiawohnia bym larkam bad ki kam thombor kam lehbor kiba long kum u mawjynthud haka jingiaid lynti ha kane ka skul pyrthei kaba iar, da kaba bynrap ba lada ngi long kiba sngewthuh ia kane ka bynta dang lah ban iaid shaphrang haka lynti jong ka jingshai kaba lam pat sha khet jong u Trai.

Ha ka por janmiet ka la don ka jingiaid procession ha kylleng ki dong ka sor Jowai da kaba rah ïaki dongmusa kum ka dak ban pyni sha ka pyrthei ïaka jingshai mynsiem ba ka Balang kala ïoh pateng na ka jinghikai Niam Unitarian.

Hashwa ka jingiaid proseshon la pynhiar iaka lama da u Emmuhot Niangti pynbud sa ka jingiaseng miet ba la pyniaid da u Moderator Kermideilang Shylla bad lam jingiaseng da u Kamwamut Khyriem.