Rakhe ka BSF ia ka ‘Raising Day’ kaba 60 da ki prokram lehkmen ha Meghalaya Frontier

Syllad | The Rising MeghalayaDecember 2, 2024

Ka Tnad shipai Border Security Force (BSF) ha ka 1 tarik Nohprah ka la ioh ban rakhe ia ka Raising Day kaba 60 naduh ba la seng ia ka lyngba ki prokram bad ki jinglehkmen bapher bpaher hapoh ka Fronter Headquarter ha Meghalaya bad kaba la pyniakynduh lang ia baroh ki unit jong kane ka kynhun shipai BSF ka Meghalaya.

Ha kane ka sngi kaba kongsan nalor ki shipai BSF la wan iashim bynta ruh da kiba haiing hasem jong ki nalor ki shipai ba la shongthait na Meghalaya ban ialehkmen ryngkat lang.

Ka la don ruh ka jingiabam sngewbha ba la tip kum ka ‘Barakhana’ kaba dei ka jingleh tynrai ha kaba la ia sam lang hapdeng ki shipai BSF nalor kito ki shipai kiba la shongthait kiba ha ki kyrdan bapher bapher kiba la pynpaw ruh ia ki jingmad jingshem jong ki bad kiba la pynpaw ia ka jingsngew sarong ban long ka bynta jong kane ka kynhun shipai BSF.

Kane ka Raising Day ka BSF ka dei shibynta ban lehkmen ia ka lyngkhuh snem naduh ba la seng ia ka ha ka 1 tarik u Nohprah 1965, bad kaba pynkynmaw ruh ia ka bynta kaba kongsan jong kane ka tnad shipai ha kaban iada ia ki jaka khappud jong ka Ri India, khamtam ha ki jaka khappud ka Meghalaya kaba kane ka kynhun shipai ka kham don bun eh.

Ha kane ka sngi la wan iashim bynta ruh da ki heh shipai jong kane ka Tnad nalor ki dkhot jong ka kiba la pynpaw ia ka jingsngewnguh na ka bynta ka jingshakri bad jingaiti lut jong kane kynhun shipai kaba la rim bha.

Katba kane ka tnad shipai ka la kynjoh sha ka 60 tylli ki snem jong ka jingiaid lynti, ka jingrakhe ia kane ka sngi kaba kyrpang ka pynkynmaw ruh ia ka jinglen lade bad ka jingaiti lut jong ki dkhot kane ka kynhun ha ka ban iada ia ki jaka puta bad ka synshar khadar jong ka ri.