Rakhe ka District Hub iaka jingpynkupbor ki kynthei ha Laskein

Syllad | The Rising MeghalayaJanuary 23, 2025

Ka District Hub for Empowerment of Women, Social Welfare Department, West Jaintia Hills District ryngkat ka jingiatreilang ka ophis Block Mission Management Unit, (MSRLS) Laskein Block haka 22 tarik Kyllalyngkot kala rakhe iaka jingdap 10 snem ka Beti Bachao Beti Padhao Programme ha ophis u Block Development Officer, Laskein Block West Jaintia Hills District.

Iaka jingialang la pyniaid da ka Kong S Lamare Gender Specialist bad District Hub for Empowerment of Women, Social Welfare Department, West Jaintia Hills District haka jingdonlang ki kynhun SHG, Asha bad ka Aganwadi, nalor kiwei.

Ka Kong S. Lamare haka jingkren lamkhmat kala iathuh iaka jingthmu jong ka jingrakhe 10 snem jong ka Beti Bachao Beti Padhao Programme kaba la sdang naduh ka 22 Kyllalyngkot 2024 bad kum shi bynta jong ka jingrakhe yn pynlong ïa ki jait kam bad ki prokram bapher bapher.

Ka Beti Bachao ka Beti Padhao ka dei ka prokram ba kongsan jong ka tnad Ministry of Women and Child Development, jong ka sorkar kmie. Ia kane ka skhim la sdang ha u snem 2015, ka skhim Beti Bachao, Beti Padhao (BBBP) ka thmu ban weng ia ki jingeh halor ka jingshah lehbein ha ka liang ka kynthei bad shynrang bad ka jingpynkupbor ia ki kynthei ha ka ri. Ka kyrteng Beti Bachao, Beti Padhao ka mut ‘Pynim ia ka khynnah kynthei, pynnang pynstad ia ka khynnah kynthei’.

Kane ka skhim ka thmu ban hikai ia ki nongshong shnong pyrshah ia ka jingsngewpher kynthei bad shynrang bad ban pynbha ia ka jingtreikam jong ki jingshakri babha na ka bynta ki khynnah kynthei.

Ka la pynpaw ba ha West Jaiñtia Hills District la pyntreikam ïa ka ha u snem 2023 bad ka dei kawei na ki bynta jong ki Mission Shakti Scheme ba la pyntreikam da ka District Hub na ka bynta ban pynkupbor ïa ki kynthei, ka tnad Social Welfare, West Jaiñtia Hills District bad naduh katei ka por bun ki prokram la pynlong ha kaba iadei bad ka jingshngain jong ki kynthei bad ki khynnah kynthei.

Nalorkata ka iathuh ruh ïa kiwei pat ki bynta kiba hap hapoh ka Mission Shakti kum ka Women Helpline 181, ka One Stop Centre, ka PMMVY, ka Aganwadi Cum Creche bad ka Financial Literacy.

U Dr FR Shadap Block, Laskein Block (BDO) Laskein Block ha ka jingkren kum u kongsan ula ong ka Beti Bachao Beti Padhao ka dei ka skhim kaba thmu ban pynkupbor ïa ki kynthei. Ula pynpaw ba ïa ki kynthei ha Meghalaya la kheiñ kum kawei na kiba donbok tam haba ïanujor bad kiwei pat ki Jylla bad kyrmen ryngkat bad ka jingpyntreikam ia ka Beti Bachao Beti Padhao kan iarap ia ki kynthei ban iashim bynta kham bun ha baroh ki kyrdan.

Ka Kong D Iakai, Child Development Project Officer, ICDS Laskein Block kala pynpaw iaki jingshakri bapher bapher hapoh ki skhim pynroi khynnah kum ka jingai jingbam bad ka prokram khynnah skul. Ka pynshlur ia ki nongiashim bynta ban leh ia ki khun jong ki ha kajuh ka rukom khnang ban pynkut noh ruh ia ka jingbym iaryngkat hapdeng ki shynrang bad kynthei.

Kiwei de kiba la ai jingkren ki long u K. Kharkongor, District Functional Specialist, District Mission Management Unit, West Jaintia Hills District (MSRLS), u F Khonglah Cluster Coordinator, Block Mission Management Unit, Laskein Block bad ka Kong Y. Kyndait, Gender Specialist, District Hub for Empowerment of Women, West Jaintia Hills District nalor kiwei