Rakhe ka Dorbar Kur Warjri ia ka lyngkhuh snem kaba Arphewsan 

Syllad | The Rising MeghalayaNovember 28, 2023

Ka Seng Kur Warjri kan pynkut ia ka jingrakhe lyngkhuh jingdap Arphewsan snem jong ka Dorbar Kur Warjri ka ba la seng naduh u snem 1998 ha ka 12 tarik Nohprah 2023 ha ka shnong Thynroit ha kaba la khmih lynti ba ki parakur parajait Warjri na kylleng ka Ri Khasi ba kin ia poi ryntih naduh ka por dang step.

La plie ia ka jingrakhe lyngkhuh arphewsan snem jong ka Dorbar Kur Warjri ha Sohryngkham ha ka 11tarik Naiwieng 2022 bad yn pynwai ia katei ka jingrakhe ha ka Dorbar ka ban long ha Thynroit.

Ha kata ka sngi yn sdang ia ka prokram lyngba ka jingpynlong ia ka jingiakop mareh thong ne Marathon naduh ka por 8 baje mynstep na Thangsning sha Thynroit, ka ban bud artat da ka Dorbar, tang shu kut ka mareh thong.

Ha kane ka shisnem ba la lah, la pynlong ia ki ba bun ki rong ki taw ban lehkmen bad kyntiew ia ki sap tynrai jong ki khynnah bad samla jong ka Kur Warjri. Ha ka ba sdang la pynlong ia ka jingpyninam ia ki syntiew bad la pynlong ruh ia ka lehkai kilan met kum ka Football bad Basketball, nangta ka thoh Essay, poitri, ka rwai ka siaw, ka shad ka kimen, ka pyninam ia ki riam ki beit bad ka thohdur thohdar.

Ki nongjop ha kine ki jinglehkai kilan met bad kilan jabieng kin sa ioh pdiang ia ki khusnam ha kata ka sngi ban long ka Dorbar ha Thynroit.