Rakhe ka Ephphatha Society iaka sngi kyrpang u diengduh rong lieh

Syllad | The Rising MeghalayaOctober 16, 2024

Ka Ephphatha Society East Jaintia Hills District haka 15 tarik Risaw kala snohkti lang bad ka pyrthei satlak ban rakhe iaka ‘World White Cane Safety Day’ ban pynsngewthuh iaka jingkongsan jong u diengduh lieh hapdeng ki paidbah.

Iaka jingialang la pynlong ha ophis treikam ka Ephatha Society kaba don ha Dkhiah West halor ka phang “Celebrating Abilities and Advocating Access for Person with Visually Impairment”.

Ka jingthmu ba kongsan jong kane ka sngi ka long ban pynshai sha ki paidbah ban pdiang ia kiba bym imat ban ai ia kajuh ka burom haka imlang sahlang ne ha kino kino ki lad iashim bynta.

Ha kane ka sngi la donlang u SDO Khliehriat Aditya Verma, IAS kum u kongsan, u Managing Director and Co-founder jong ka Blind Lead Trust Organization u Ma Jitendra Dkhar, u Rev ES Sapooh Managing Director ka society nalor kiwei.

U SDO Aditya Verma IAS, haka jingkren ula ong, kine ki briew kidei u maw kordor bad ka imlang sahlang kadei ban sngewthuh ia kane bad ban wanrah ka jingkylla haka sain pyrkhat da kaba phaikhmat shaka jinglah ka jong ki lyngba ki sap ki talent ba u Blei ula ai haki.

“Wat ju artatien ialade ngin don ha syndah ka jong phi”, la ai mynsiem u SDO.

U Ma Jitendra Dkhar haka jingkren ula ong, u diengduh lieh udei ka khmat jong ki bym imat, u paralok ba shaniah tam bad uba ym lah ban duh ia u namar u iarap ban jam shilliang iaka surok bad ha kino kino ki jingdonkam khlem da shaniah ha kiwei pat.

Ha kaba iadei bad ki jingduna ki jingdonkam jong ki briew kiba duna dkhot met, u Ma Dkhar ula ong nujor bad kiwei ki jylla, ka Jylla Meghalaya ka dang duna ha baroh ki liang ban pynbiang pynbit iaka jingdonkam jong kiba duna dkhot met, la ka long haka lynti synkieng, ka lad iohkam iohjam, ka jingnang jingstad nalor kiwei kiwei.

Haba kyntu iaka paidbah khamtam ki nongiaid lynti bad ki nongniah kali, u Ma Jitendra ula kyntu ban niah kali da kaba don akor ban lait na ka jingtynrah bad iuh ia u diengduh lieh jong ki bym imat namar ka jingiuh ia diengduh lieh ka long kumta phut iaka khmat jong ngi.

U Ma Jitendra Dkhar ula kyntu iaki paidbah ba haba iohi ia kiba matlah haki lynti synkieng khamtam haki jaka ba bun kali bad ki jaka ban jam shilliang surok, kylli iaki la ki kwah jingiarap ne em, ai ba ma ki kin ong kaba kumno ki jingiarap ki kwah, pyrshang ban kren da ka sur kaba jem bad kaba jaijai. Nalorkata lada phi kwah ban iarap ia ki bym imat, iathuh iaka kyrteng ka jong phi haba phi kren iaki nangta sa tyrwa iaka jingiarap jong phi.

U Ma Kermiki Siangshai dkhot jong ka Society ula iathuh ba iaka Ephphatha Society la seng ha u snem 2020 halor ka nongrim ban khmih kyrpang ïa kito ki briew kiba don jingduna ha ki dkhot met. Ha kane ka Centre la ai jinghikai ruh ia kiba duna dkhot ban suh jain bad hikai tem hikai pud.

Hadien ka jingialang u SDO ula leit jurip iaka jaka ai jinghikai bad ula kyntu iaki nongpyniaid ka Ephphatha ban sumar bha iaki tiar ki tar ba kila ioh jingiarap khnang ban myntoi.