Rakhe ka HFU iaka sngi kyrpang ki nongrep ha Ummulong

Syllad | The Rising MeghalayaDecember 8, 2020

Ka Hill Farmers’ Union (HFU) West Jaintia Hills Unit haka 4 tarik kala rakhe pyndon burom iaka sngi kyrpang ki nongrep kaba tip kum ka 1st Farmer’s Day ha Community Hall Ummulong West Jaintia Hills.

Ha kane ka sngi kyrpang ki nongrep la wan ban ïa shim bynta da ki nongïalam jong ka HFU na ki Unit bapher bapher ki ba don hapoh ka Thadlaskeiñ Block, ka Laskeiñ Block bad ki officer sorkar naka tnad Agriculture, Horticulture bad Meghalaya Basin Development Authority West Jaintia Hills.

Ïaka jingialang la pynïaid da u Mutshwa Thabah President HFU bad la ïoh ki kyntien pdiang sngewbha na u Fourly Dhar Vice-President.

La ïoh ruh ki jingkren na u Marbiang Phyllei Adviser HFU Jaintia Hills uba la batai shaphang ka jingïaid lynti jong ka seng ha Jaintia Hills bad ki jingeh ba ki nongrep ki ïakynduh.

Ki ophisar sorkar kynthup ïa u Sywel Lyngdoh District Project Manager MBDA West Jaintia Hills, u M Lamare Assistant District Agriculture Officer bad u Bah C Najiar Assistant District Horticulture Officer ki la batai pynshai halor ki lad jingïarap ïaki nongrep bad kumno ban kyntiew ïa ka rep ka riang bad kiwei de ki kam ba ïadei bad ki nongrep.

Ha katei ka sngi la pynskem ïaki 10 tylli ki Unit thymmai jong ka seng ki ba hap hapoh ka Thadlaskeiñ block bad ruh la sam ïa ki khusnam sha ki nongrep ki ba trei shitom bad ki ba ïaid bha shakhmat wat hapdeng ka jingpynthud jong ka khlam Covid-19.

La ïoh ruh ka jingkren ai mynsien na ka Kong Trinity Sayoo ka nongrep ba la ïaid bha shakhmat khamtam ha ka kam rep synrai ha ka thain Laskeiñ Block.

Ha ka bynta ba ar jong katei ka sngi, ka la don ka jingïalang phylliew jingmut hapdeng ki nongïalam jong ki nongrep na ki Unit bapher bapher bad la ïatai halor kiba bun ki phang ki ba ktah ïaki nongrep naduh ka dor ka mur, ki ïew ki hat, ka jingshah khñiot beit ha ki nongkhaïi, ka jingshah pynjot ha ka mariang, ki sboh, ki symbai bad kiwei kiwei de.

Ka HFU ka la shim ruh ïaka sienjam ban dawa naka sorkar lyngba ka tnat ba dei peit ïaki ïew ki hat jong ka Jaintia Hills Autonomous Dictrict Council Jowai ban khang bad ban pynduh noh ïaka jingah kilo ïa baroh ki mar rep ba die ha ki ïew ki hat hapoh ka District.