Rakhe ka jylla iaka sngi ba kyrpang ki nonghikai

Syllad | The Rising MeghalayaSeptember 5, 2022

Ka jylla ka la snoh kti bad shi tyllup jong ka ri ban rakhe pyndon burom ia ka sngi ba kyrpang ki nonghikai kaba juh ia tip bha da baroh ‘Teacher’s Day’ bad kumba juh long na ka liang ka tnat pule puthi, ka juh pynlong ia ka prokram kaba kyrpang da ka jingsam ruh da ki khusnam sha ki nonghikai.

Ha kane ka kynti ka jingrakhe ia ka Teachers Day, la pynlong da ka jingialang ha Soso Tham Auditorium, ha kaba u kongsan ha kane ka sngi dei u Myntri ba dei khmih iaka tnat  pule puthi u bah Lahkmen Rymbui.

Nalor kattala don lang ruh u Commissioner & Secretary Education ka sorkar jylla u Dr BDR Tiwari (IAS) u Secretary education u Ambrose Ch Marak (IAS) bad kiwei kiwei.

Ha kane ka snem kaba mynta na ka liang ka jylla Meghalaya ka Gamchi Timre R Marak Head Teacher jong ka Educare Higher Secondary School,  Williamnagar, East Garo Hills  ka la shah jied ban ioh pdiang ia ka National Award.

Haba kren kum u kongsan ha kane ka jingialang, u bah Lahkmen Rymbui u la pyrshang ban kren lyngkot ia kiba bun bah ki kam kiba kum ka tnat ka la leh ha kine ki san snem, ki jingeh kiba u ia tyngkhuh na kawei ka sngi sha kawei pat, ka jingbym lah ban pynbiang dei por ia ka tulop, ka jingbym lah ban ioh biang por sa ia ka bhah pisa na ka sorkar kmie bad kumta ter ter.

U bah Lahkmen u la ong ba u la shem bad iohi ia ki jingeh kaba la pynring swai ia ka kynhun jong ki nonghikai bad kaei pat ka sien jama kaba donkamban hap ban shim shakhmat.

Pynban u bah Lahkmen um lah ban khlem da pyrto bad iaroh ia u Secretary ba mynta ka tnat u Ambrose Ch Marak  ba ha kine ki 8 snem kiba la leit noh u ka shim halade ia ka jingkitkhlieh ban shah hakhmat ia kiei kiei ki jingjia kiba kum ka tnat ka shah kren shah kynthah na ka por sha ka por.

Hynrei u bah Lahkmen u sngew pat ban ong ba ka tnat Education kam long kum kiwei kiwei ki tnat treikam jong ka sorkar, namar ka tnat ka hap ba kan shong bad treikam bad ki kam ki jam ba man la ka sngi bad kaba kham kongsan lei lei eh ka long ka jinghap ban trei ryngkat bad katta ka jingthrang bad angnnud jong uba bun balang, hynrei u sngew pat ban ong ba dei tang kane ka sorkar MDA kaba mynta, kaba la shim ha ka ia kiei kiei baroh ki kam kiba eh bad ba jwat ban pyrshang ban leh pat ia kaei kaba bha na kiba bha tam.

Ha kane ka jingialang ka la don ka jingsam ia ki khusnam kaba kynthup ia ka State bad kumjuh ka District Award ia kaba la la bynrap da ki jingrwai bad ki jingshad ba la ai da ki khynnah jong ka skul bad ia ki kyntien ai khublei la ioh na kong M Lyngwa District School Education Officer, East Khasi Hills District, Shillong.

Ki khusnam ba la pynkup ia ki nonghikai ha kane ka jingialang pyndon burom ia ka nsgi ba kyrpang ki nonghikai ki long:

State Awards

1. Smti Lasubon Shullai, Assistant Teacher, Laittyra UP School, Laittyra

2. Shri. Dibiland Iawphniaw, Headmaster, Malaisohmat UP School, Phlangwanbroi

3. Smti. Sidamon Kurbah, Headmistress, Wahrit Govt. UP School

4. Smti. Bioles Lyngdoh, Assistant Teacher, Mawthawpdah (Def) UP School Mawthawpdah

5. Shri. Dipak Kumar Saha, Assistant Teacher, Govt. Boys’ Higher Secondary School, Jowai

6. Shri. Arun Kumar, Principal, Seinjait Tuber HS School, Tuber Kmaishnong

7. Shri. T P Tmung, Principal Umroi Presbyterian HS School, Umroi

8. Shri. Jeremias Kharbani, Headmaster, Mangsang Secondary School, East Garo Hills

9. Shri. Dominic Marak, Assistant Teacher, Don Bosco HS School, Mendal

10. Shri. Jairaj  Chetry, Headmaster, Gorkha Deficit UP School, Tura

11. Smti. Hezillina T Sangma, Head Teacher, Akkonggre Govt. LP School

12. Smti. Dewbarlinda B Sangma, Headmistress, Ampati Deficit UP School

13. Shri. Lindstorm K Marak, Headmaster, Rugapara Deficit Secondary School

Nalor katta la pynkup burom ruh ia ki nonghikai ha ka kyrdan ka district award kaba leit sha ki 33 ngut bad naka bynta ka East Khasi Hills, kiba la ioh pdiang ia kane ka khusnam ki long  Smti. V Dipali Sharma Rao, Principal, Laban Assamese Girls’ HS School, Laban, for the Secondary Section Smti. Philosimai Syiem, Assistant Teacher, Nongkrem Govt. UP School, Nongkrem for the Upper Primary Section bad Smti. Belinda Kharsati, Head Teacher, Pomlahier LP School Lower Primary Section.

La sam ruh sa ia ka khusnam ba kyrpang ne ka special award (inclusive school kaba mynta ka kynti ia kane ka khusnam, la ioh da  kong Josephine Lyngdoh, Special Educator, Mary Rice Centre for Special Education, Laitumkhrah, Shillong, nangta u bah Habandamon  Rani  ka Seng Khasi HS School, Shillong bad kong Deigracia A Shylla  ka Holy Child HS School, Shillong ia ka khusnam Scoutmaster & Guide.

Ha Jowai, la rakhe iaka sngi kyrpang ki nonghikai ha iingwalieh ka Tpeppale ha kaba u MLA ka Jowai Waildmiki Shylla ula long u Kongsan, ka Kong Danida D Syngai Additional Deputy Commissioner, kum ka symbud kongsan haka jingiadonlang ka Kong A.P Syiem, District School Education Officer, Jowai, ki nonghikai bad ki khynnah skul na ki skul bapher bapher ka District.

Ka khusnam District Awards la pynkup ia u Ma Hubert Thyrniang, MSc (Physic) Assistant Teacher na Govt. Girls Higher Secondary School, Jowai. Ka Kong Fabriously Suchiang BA, Trained Headmaster na Shangpung Govt. UP School bad u Ma Beyon Lanong MA (Pol) Head Teacher na Sohkha Shnong Govt LP School.

Ïaka khusnam Best Scout Master la ïoh da u Teilang Rymbai A/T Achiever Sec School Ummulong bad ka khusnam Best Guides Captain da ka Rosie Bang R/Leader Thomas Jones Synod College, Jowai.