Rakhe ka KAS iaka lyngkhuh sngi iap ba 83 u Myllung Soso Tham ha Khliehriat

Syllad | The Rising MeghalayaDecember 19, 2023

Ka Khasi Authors’ Society (KAS), shnat Khliehriat ha ryngkat ka jingiatreilang ka Khasi Department jong ka Jaintia Eastern College, Khliehriat haka 18 tarik Nohprah ki la rakhe iaka lyngkhuh sngi iap ba Phra phew Lai snem jong u Myllung Soso Tham uba long u riewkhraw ka jaitbynriew uba la noh synñiang ha ka thoh ka tar u Khasi.

Shibynta jong kane ka sngi, la pynlong ruh da ka lympung iamir jingtip halor ka phang “U synniang jong u Myllung Soso Tham shaka jaitbynriew Khasi”, ia kaba la pynlong ha Hall ka Jaintia Eastern College, Khliehriat.

Ha kane ka sngi la donlang u kongsan Dr. WR Kharlukhi MP Rajya Sabha, u Myntri ka sorkar jylla Bah Kyrmen Shylla kum u symbud kongsan haka jingdonlang ki nonghikai bad samla pule jong ka Thomas Jones Synod College, Jowai, Kiang Nangbah Govt. College, Jowai, Nontalang College, Don Bosco College, Byndihati bad Jaintia Eastern College, Khliehriat.

Iaka jingialang la pyniaid da u shongknor u Bah ES Shangpliang Vice President ka shnat Khliehriat bad la ioh ka jingkren pdiang burom na u Principal ka kolej u Dr. Phervision Nongtdu bad ki jingkren na u President KAS Dr. RL Nonglait.

U Dr. WR Kharlukhi haka jingkren kum u kongsan ula pynkynmaw iaki matti ba khraw jong u Myllung Soso Tham ban pyndap ia u thiar ka thoh ka tar jong ka jaitbynriew Khasi. U ong ruh ba u Soso Tham u long u nongai mynsiem ia ka jaitbynriew bad kiba ka pateng ba mynta ka pyrto.

Shwa kane u Dr. RL Nonglait haka jingkren maitphang, ula iathuh ba iaka Khasi Authors’ Society la seng ha ka 11 tarik Nailur, 1979 bad ka jingthmu ba kongsan ka long ban pynmih iaki jingtip ki ban iarap kyntiew bad pynriewspah iaka ktien bad ka thoh ka tar. Ka ‘tienphira ne motto jong ka KAS ka long ‘Pyniar iaka ktien Khasi.’

Ula iathuh iaki katto katne ki jingtrei jong ka KAS bad ki mat jingdawa, kum ka jingpynkhreh iaka Khasi-Khasi Dictionary kaba la iaid mynta la Ar snem bad katkum ka jingbthah jong ka Supreme Court, ban pynkylla ne translate ia 200 tylli ki Supreme Court Judgement ne kino kino jingbishar ne ki rai jong ka iingbishar ba hakhlieh duh jong ka ri India kaba long uwei pat u maw jam jong ka jingroi jingsan jong ka ktien Khasi.

Ha kaba iadei bad ki jingdawa, ula ong ka KAS kala dawa ban pynlong noh iaka ktien Khasi kum ka official language ne ktien sorkar bad ban pynrung iaka ktien Khasi hapoh ka Khyrnit kaba Phra jong ka riti synshar ka ri India.

Ula iathuh ba iaka jingpynrung iaka ktien Khasi hapoh ka khyrnit kaba phra, la dawa la kumba 40 snem bad ka KAS ka la leh ia baroh ban pynurlong ia kane ka jingdawa. Ka sorkar jylla ha u Naiwieng 2018 ka la wanrah iaka Asssembly resolution ban kyrpad iaka sorkar India ba kan pynlong noh iaka ktien Khasi kawei na ki schedule languages.

Kumta ula kyntu iaka sorkar jylla khamtam lyngba ki kongsan jong kane ka sngi ban shimkhia ia kane ka kam bad khmih lynti ba lyngba ka jingdonkam jong ki lehse ka jingdawa jong ka KAS kan sawa khamjam ym tang hapoh ka sorkar jylla hynrei haka sorkar kmie ha Delhi.

Haka sien shong kaba 2, ka la don ka lympung iamir jingtip ha kaba ki riew shemphang kiba la wan ban ai jingbatai ki long Prof S Dkhar kaba la batai shaphang ‘Ki snap ka kolshor Khasi kumba ki paw haki poim u Myllung Soso Tham’, Dr K. Phawa halor ka phang ‘U Myllung Soso Tham kum u nongkyrsiew iaka jaitbynriew bad na u Prof OR Shallam.

U kongsan ha kane ka sngi ula pyllait paidbah ruh iaka kot kaba kyrteng ka “Shi hara ki sur myllung bad ki esse” ba la thoh da ki samla pule ka Jaintia Eastern College, Khliehriat bad ba la pynbit pynbiang da u Dr. Davidson Diengdoh.

Haka sien shong kaba 2, ka la don ka lympung iamir jingtip bad ki riew shemphang kiba la wan ban ai jingbatai ki long Prof S. Dkhar kaba la batai shaphang ‘Ki snap ka kolshor Khasi kumba ki paw haki poim u Myllung Soso Tham’, Dr. K Phawa halor ka phang ‘U Myllung Soso Tham kum u nongkyrsiew iaka jaitbynriew bad na u Prof OR Shallam.

La pynphuh iaka jingrakhe da ki jingrwai na ki samla pule jong ka Jaintia Eastern College, Khliehriat bad ha kaba kut u kongsan ula pyllait paidbah ruh iaka kot kaba kyrteng ka “Shi hara ki sur myllung bad ki esse” ba la thoh da ki samla pule ka Jaintia Eastern College, Khliehriat bad ba la pynbit pynbiang da u Dr. Davidson Diengdoh.