Rakhe ka KAS, Mawkyrwat ia ka jingdap 183 snem ka jingwan iuhkjat u Thomas Jones ha Rilum Khasi

Syllad | The Rising MeghalayaJune 23, 2024

Ka Khasi Authors’ Society shnat Mawkyrwat, South West Khasi Hills District ha ka 22 tarik Jylliew ka la rakhe ia ka jingdap 183 snem ka jingwan iuhkjat u Thomas Jones hangne ha Rilum Khasi da kaba pynlong ia ka lympung iamir jingmut hapoh Sngap Sing Syiem College.

Ha kane ka sngi la ia don lang u MLA ka thain u Bah Renikton Lyngdoh Tongkhar kum u Kongsan uba ha ka jingkren u la ban jur halor ka jingdonkam kyrkieh ban ioh noh ka jingithuh ia ka ktien Khasi hapoh ka khyrnit ba phra jong ka Riti synshar Ri.

Kiba la ai ia ka jingkren kaba bniah ha kaba iadei bad kane ka phang ki kynthup ia u Pastor GPL Kadew bad u Lyngdoh Ioannis War Pakma.

U Pastor Kadew u la kren sani halor ka mynsiem sngewlem jong u Thomas Jones ia ki Khasi kiba la shah thombor ha ka sorkar Bilat. U la kdew ba kumno u Thomas Jones u la kyntiew ia ka imlang sahlang jong ki paidbynriew Khasi khamtam ha ka kamai kajih bad ka pule dangle, namar ba u ngeit ba kaba ialap ia ka khubor babha jong ka balang Khristan kan urlong tang lada ki kam sngewlem ki ktah ia ka dohnud jong ki paidbah.

Kumta u la adkar ban hikai niam bad kham khluh ban hikai ha ka trei ka ktah ban kamai kajih bad ban hikai ia ka jingnang jingstad kum ka atiar ban kyntiew ia ka jingim briew ha ka imlang sahlang.

U Lyngdoh Ioannis War Pakma u la sot na ki nongthoh ba pawnam jong ka jaitbynriew Khasi ban phalang ia ka iitkhmih jong ka jaitbynriew lyngba ka jingthoh jong ki, khamtam ki symboh pyrkhat jong u Myllung Soso Tham, Rabon Sing Kharsuka bad kiwei kiwei.

Nalor kata u Lyngdoh Pakma u la ban jur halor ka aiom ksiar kum ka pharshi kaba phalang ia ka jinglong briew ba bha ha ka ba iadei bad ki parabriew ha ka imlang sahlang.

Ha kane ka sngi la ioh ruh ka jingrwai ba kyrpang na ka  kynhun Iong Lajong kum ka dak ban nguh burom ia ka nam jong u Thoma Jone kum u nongshem ia ki dak thoh Khasi.