Rakhe ka Khasi Authors’ Society ia ka lyngkhuh snem kaba 45 da ki prokram bapher bapher

Syllad | The Rising MeghalayaSeptember 12, 2024

Ka Seng ki Nongthohkot Khasi, ka Khasi Authors’ Society (KAS) ka la rakhe ia ka lyngkhuh snem kaba sawphewsan jong da ka ba sam khusnam sha ki samla ki ba jop ha ki kyrdan ba ha khliehduh ha ki jingpule bapher bapher, bad la pynlong ruh ia ka lympung iamir jingtip bad pyllait ia ki kot thymmai da ki dkhot ka seng.

Ha kane ka sngi la ia don lang ruh u Dr. Ricky A J Syngkon MP ka Lok Sabha kum u Kongsan uba la pynpaw ba bun kiei kiei ki ba iadei bad ki lad ban kyntiew ia ka thoh ka tar, khamtam ha ka ba iadei bad ka jingpynrung ia ka ktien Khasi ha ka Khyrnit Baphra jong ka Riti Synshar ka Ri India.

U Dr. Syngkon u la ban jur halor ka jingdonkam ban pynneh ia ki ktien shnong na kylleng ki thaiñ ha jylla ban pynriewspah ia ka ktien pdeng bad kyntu ruh ban kiar na ka ba pyndonkam da kiwei ki ktien mynder.

Ha ka ba sdang la ioh ka jingkren lamphrang na u nongialam ba halor jong ka seng u Dr D R L Nonglait u ba la batai sani ia ka lynti jong ka seng ha ki sawphew snem tam na ka bynta ban kyntiew ia ka thoh ka tar bad ia ka ktien Khasi sha ki kyrdan ba kongsan ha Ri India bad ha satlak pyrthei.

U Bah Nonglait u la iathuh ruh ba ka seng ka la pyniar hynñiew tylli ki shnat jong ka ha jylla bad lai tylli ha kylleng ka Ri India, kum ha Delhi, Bangalore bad Kolkatta. Nalor kata u Bah Nonglait u la kdew ruh ba ki salonsari ba don ha jylla ruh ki la kynthuip ia ka jingpule ia ka thoh ka pule Khasi ha ki kyrdan ki ba hakliar haduh ka Ph D.

Ha kane ka sngi la sam khusnam ruh sha ki khatwei ngut ki samla ki ba tyngshaiñ ha ki shlem pule ha jylla ki ba kynthup ia ka Ribahunlang Lamarai, Ialammiki Lamare, Josiah Duncan Lyngdoh Mawphlang, Claudia Aurelia Khyriem bad Abigail Ioanna Suchiang ki ba wan shakhmat ha ka SSLC bad ICSE. Nalor kine la sam khusnam ruh sha u Pynbha Lynshiang, Menangmankhraw Kharkongor, Ferry Filarisha Wann, Ritilian Diengdoh, Ar Meker Marpna ki ba wan shakhmat ha ka HSSLC bad Badaker Nengnong Daloi ha ka BA.

Nalor kata la pyllait ruh ia ki lai tylli ki kot jong u Bah Hamles Mylliem Umlong ka ba la jer ‘Ka Antigone,’ ka kot shaphang ka Kheiñkur Kheiñkha Khasi da u Bah Raphael Warjri bad ka kot shaphang ka riti mawbah mawbynna, ‘The Megalithic Culture of Khasi Jaintia Hills da u Dr Marco Babit Mitri. Ia kitei ki kot la pyllait paidbah da u kongsan Bah Ricky A J Syngkon ha ryngkat ki kynrem lyndan ha rynsan kiba kynthup ia I Kong Silbi Passah, Bah Spiton Kharakor, Bah Laborious Manik Syiem, Dr Eureka Lyngdoh, Principal Sankardev College, Dr D R L Nonglait, Dr R P Kharshiing, Saiñpyniar, bad Bah K D Ramsiej, Symbud Khlieh Rangbah ka seng Khasi Authors’ Society.

Ha ka kylla sngi ka la don ka lympung iamir jingtip ba la kren da ki dkhot rangbah ka seng bad uwei u samla ia ka phang jong ka Shillong- Mynnor Mynta bad Lashai. Ki kynrem lyndan ba kren ha ka lympung mir jingtip ki long u Dr Desmond L Kharmawphlang, Dr Soloni Bareh, Bah Kitbor Nongrum, Bah Phrikshon Kharshiing ha ka kylla step bad ki kynrem lyndan ha ka kylla sngi ki long u Dr Kynpham Sing Nongkynrih, Bah Wansoon Kharkrang bad u samla W Norbert S Jana Nongbet.