Rakhe ka Khasi Author’s Society iaka sngi U Thomas Jones ha Jowai

Syllad | The Rising MeghalayaJune 22, 2023

Ka seng ki nongthoh kot ka Khasi Authors Society (KAS), Jowai unit ryngkat ka jingïatreilang ka Thomas Jones Synod College, Jowai kala rakhe ïaka jingdap 182 snem ka jingwan iuhkjat U Rev Thomas Jones u kpa ki dak thoh Khasi haka sngi Palei.

Ka KAS kala rakhe ia kane ka sngi lympung ïamir jingtip halor ka phang “U Synñiang u Thomas Jones sha ka Jaitbynriew Khasi” ha Thomas Jones Synod kolej.

Shuwa ka jingiamir jingmut la don ka jingialang kaba lyngkot kaba la pyniaid da ka ka Kong Renda Manla Khonglah Jt. Secretary, shnat Jowai KAS haka jingdonlang u kongsan u Rev K. Pariat, Senior Executive Secretary KJP Synod Mihngi, ki dkhot ka KAS Shillong, Jowai bad Khliehriat, u Principal ka kolej u Dr. DG Lyngdoh, ki nonghikai bad ki samla pule ka kolej.

Haka jingiamit jingmut haka wat nyngkong la pynïaid da ka Kong Renewbiang Dkhar KASSJ bad haka sien shong ba ar ïaka jingïalang la pynïaid da u MM Thaiang Vice President shant Jowai KAS.

Ki riew shemphang kiba la ai jingbatai ki long u president ka KAS Shillong u Dr. DRL Nonglait uba la kren halor ka “Ka thymmei u Thomas Jones bad u Synñiang shaka thoh ka tar” bad u Rev. HCT Sumer uba la batai halor ka phang “U Synñiang u Thomas Jones sha ka imlang sahlang”.

Shwa kane u RP Kharshiïng Finance Secretary KAS, ula ïathuh ba ïaka Khasi Authors’ Society la seng haka 11 tarik Nailur 1979 da ki 9 ngut ki nongthoh kiba long ki riewkhraw jong ka seng ki nongthoh kot Khasi. Kita ki long u Babu BC Jyrwa, u Dr. HW Sten, Bah LG. Shullai, Bah DT. Laloo, Bah H Mylliemngap, Bah K Rapthap, Bah H Warjri, Bah Kitbor Nongrum bad Bah EW Dkhar.

Ula ong, ka Khasi Authors’ Society naduh ba la seng ïaka, kala shim kawei ka thong ban pynneh pynsah ïaka Ktien Khasi khamtam ban kyntiew haka liang ka thoh ka tar.

Ula ong ba ïaka Ktien Khasi la hikai haki skul bad la pule ïaka haduh ka kyrdan PhD, nalorkata, la lah ruh ban pynlong ïaka ktien Khasi ka ktien synrop jong ka sorkar Meghalaya bad ïaka notification la pynmih naduh ka 4 tarik u Jymmang, 2005 bad la pyndonkam ïaka ktien Khasi haki ophis treikam ka sorkar.

Ula ïathuh ba ka KAS mynta ka dang ïaksaid ban pynrung ïaka ktien Khasi haka Khyrnit kaba Phra jong ka riti synshar jong ka ri India.

Ula pynkynmaw ruh ïaka jingiaid paidbah kiba la pynlong haki District bad nongbah Shillong ban dawa pynrung ïaka ktien Khasi haka Khyrnit kaba Phra jong ka riti synshar jong ka ri India bad ula ong ki jingïaleh ki long kiba jop namarba ka sorkar ka shimkhia ban pass ïaka resolution ban ithuh noh ïaka ktien Khasi bad la phah sha ka sorkar kmie.

Ula khot iaka jingïatreilang ki nongthoh kot ban pynmih ïaki jingthoh bad ki jingdawa ban kyrsiew ïaka sorkar Jylla ba kan tynruh ïaka sorkar kmie ban ithuh bad pynrung noh ïaka ktien Khasi haka khyrnit kaba phra jong ka riti synshar jong ka ri India.

Ula ong ïaka jaitbynriew yn ithuh lada ka ktien ka im, kumba ka ktien ka ong, “Haba im ka ktien im ka Jaitbynriew”, bad lada rung ka ktien Khasi haka khyrnit kaba phra, ka ri India kan ithuh ïaka Jaitbynriew kum ka Jaitbynriew kaba kyrpang bad kan plie ruh shibun ki lad jingmyntoi.

U President ka KAS Shillong u Dr. DRL Nonglait kum u riew shemphang, ula ong haba pyrkhat ïaka jingwan u Thomas Jones sha ri Khasi da ka bor shemphang briew, lah ban ong ba u wan tang kum u missioneri ka Balang Khristan kaba la ïoh ruh katto katne ki jingïarap na ka sorkar phareng ban seng skul bad ruh ban pynrung ïaka rukom pyrkhat ki nongsynshar (English) haki Khasi.

Ula ong ba u Thomas Jones kum u Welsh (colonised) um long u briew jong ka sorkar Bilat, haka jingshisha u long uba naduh la ka jong ka ri ula shah ibeiñ haki English.

Ula wan ban shakri ïa kawei pat ka ri kaba la shah jop ha kijuh ki nongsynshar donbor. Ka jingshah ibeiñ haki English ka ïai beh ïa u wat haba ula wan sha ri nongwei haduh ki sngi ba khatduh ka jingim jong u, pynban um shym la pyndem haki hynrei tang haka bor lahduh jong U Blei, la ong u president.

Ula ong ruh ba u Thomas Jones ula ïap noh shiteng rta haba ula shah behbeiñ namar ba u ïaleh ban pynïoh ïaka hok ki Khasi. Ki nongshun jong u Thomas Jones, ki lah ban ïohi ïa u kumba ula shah jop, hynrei ka jaitbynriew Khasi kan ym klet noh ïa u.

Ula ong u Thomas Jones un ïai im kum u kpa ki dak thoh Khasi, u nongseng ïaka nongrim ba neh ka litereshor Khasi bad skul Primary. Kat ïa kaba u lah, u Thomas Jones ula ai bad ula aiti ruh ïaka jingim. Hato don ki jingai kiba kham kordor ïaka jaitbynriew Khasi ban ïa kine?.

U Rev. HCT Sumer ula ong, ka long kaba pynsting ïaka jingsngew-kitram kum ka jaitbynriew Khasi haba la ïoh ban rakhe ïaka 22 tarik Jylliew kum ka “Thomas Jones Day”. Kadei shisha kum ka jaitbynriew Khasi kadei ban kynmaw burom ïa u Thomas Jones uba long u nongrah jingshai bad u nonglehbha ba nyngkong eh ïaka jaitbynriew.

“Ngim lah ban len ba dei lyngba ka jinglenlade bad ka jingtrei shitom jong u Thomas Jones, la thaw dur thymmai bad la kyntiew ïaka jaitbynriew Khasi Jaintia kumne kumba ka long mynta, la ong u pastor Sumer.

Ula ong hashwa ka jingwan jong u Thomas Jones sha kine ki lum Khasi, ngi long ki briew kiba sah haka jingdum bad kiba la shah ibeiñ ha kiwei pat ki jaitbynriew namar ka jingbym don ïaka thoh ka tar bad ka jingduna haka shemphang shembuit.

Hynrei mynta pat da ka jinglenlade bad jingnoh synñiang jong u Thomas Jones la pynkylla dur thymmai noh ïaka jaitbynriew bad la kyntiew ïaka burom ka ijot jong ka sha kata ka kyrdan kaba ïaryngkat bad kiwei pat ki jaitbynriew jong ka pyrthei, la ong u pastor Sumer.