Rakhe ka Kiang Nangbah Government College ia ka lyngkhuh snem kaba 57, yn sdang noh ka klas iaki samla ba jied ban long nonghikai

Syllad | The Rising MeghalayaSeptember 15, 2023

Ka Kiang Nangbah Government College ka la rakhe ia ka lyngkhuh snem kaba 57 naduh ba la seng ia ka haka sngi Thohdieng hapdeng ka jingiphuh ipheing lyngba ka jingiashim bynta shitrhem da ki nonghikai, ki staff bad ki khynnah pule hapoh auditorium hall.

Ha kane ka sngi la ia don lang ruh u Dr. SR Lyndem kum u Resources Consultant ka RUSA uba la pynpaw ia ka jingkhublei na bynta ka college halor ka jingai burom na ka bynta jong u. U la pyrto ruh ia kane ka jingiaid lynti jong ka college lyngba ka jingwanrah ia k Integrated Teacher Education Programme (ITEP) Course kaba saw snem kaba kynthup ia ka B.A. B.Ed. bad B.Sc. B.Ed.

Nalor kata u la pynpaw ruh ba ym don kiwei pat ki college ha ka jylla ki ban ioh pdiang ia kaei kaba ka Kiang Nangbah Government College ka la ioh. Kane ka college ka la lah ban pyndep ia ki kyndon jong ka NAAC kumjuh ia ka standard jong ka.

U Dr Lyndem u la ong ruh; “Nga la sakhi ia ki jingeh kiba ki jaka pule ki la mad ha ka jylla, bad ka Kiang Nangbah Government College ka la dei hok ban ioh ia ka kyrdan A++ rating namar lada ka A+ ka ieng hakhmat jong phi, kin ym poi shano shano ruh. Ka dei ka por ban lehkmen, bad ban ai ka jingithuh ia ki nonghikai bad ki khynnah pule.”

Ula kyntu ruh iaki nonghikai bad ki samla pule ban don iaka mynsiem ban kyntiew ban myntoi ka kolej ban ia kaba long ki jingeh iaka kolej.

Kiwei pat kiba la aijingkren ha kane ka prokram ki kynthup ruh ia u JP Sharma, IQAC Coordinator, Dr. EM Blah, principal ka college kaba la ai ka jingkhublei ia ki nongseng jong ka college kumjuh ia ki nonghikai bad ki staff kiba la trei shitom bad pynwandur ia ki khynnah pule kumjuh ia ka tnat pule puthi ka sorkar jylla halor ka jingiai bteng ban ai ka jingkyrshan ha kaba iadei bad ki jingdonkam kiba iadei bad ka jingpynheh pynsan ia kane ka jaka pule.

Ha kane ka sngi la pynkup burom ruh ia u JP Sharma halor ka jingai jingshakri kaba 25 snem jong u hapoh kane ka college, ki nongialam ka college bad ki khynnah pule kiba la ioh heh mark tam ha ka sobjek Mathematics ka Salancy Pohleng bad Botany ka Shandakabiang Suchiang.

La nang pynphuh pynphieng shuh shuh ia kane ka sngi lyngba ki jingshad jingrwai na ki khynnah pule.