Rakhe ka KVK Jaintia Hills iaka World Milk Day, pynshlur iaki nongrep ban ri masi ban kiew ka ioh ka kot

Syllad | The Rising MeghalayaJune 2, 2021

Man la u snem ha ka 1 tarik u ‘nai Jylliew la rakhe iaka World Milk Day, naduh u snem 2001, da ka Food and Agriculture Organisation (FAO) jong ka United Nations ban pynkynmaw iaka jinglong kongsan ka dud haka bam ka dih ha baroh shityllup ka pyrthei.

Ka ri India ka long kaba khlaiñ eh ban pynmih dud bad ka wan nyngkong haka pyrthei baroh bad ha u snem 2019-2020 kala lah ban pynmih haduh 198.4 million ton ka dud. Ha ri India la rakhe iaka Milk Day haka 26 Naiwieng ban kynmaw burom ïaka sngi kha u Dr. Verghese Kurien (26 November 1921), Father of White Revolution uba long ruh u nongseng iaka company pynmih dud ka Amul.

Watla ka ri India ka wan haka kyrdan kaba nyngkong haka jingpynmih duh, ka West Jaintia Hills District ka don haka jingma bad la tip iaka kum ka Critical District namar ka jingbym biang ka rukom bam dih ïaki symboh jingbam jingdih ba biang kiba tei ïaka met u briew bad kane kala ktah ïa kiba bun ki samla bad khyllung khynnah. Haduh mynta dang bun kiba ym pat shim iaka dud kum ka jingbam ba tei bad kaba long kongsan bha ïa baroh naduh khyllung haduh kiba rangbah. Ki riewshemphang bad ki doktor ki ong ba kiba dih ïaka dud ki ïoh ka symboh jingbam kaba biang (balanced diet)  kaba ïarap ban tei ïaka met u briew bad ïoh ruh har rukom ki vitamin kaba ïarap ban ïakhun ïaki jingpang.

Kum shibynta ban kynmaw burom ia ka World Milk Day bad ka jinglong kordor ka dud, ka Ophis Krishi Vigyan Kendra (KVK) Jaintia Hills kala pynlong da ka webinar lane jinghikai online ban ai jinghikai iaki nongrep halor “Ki Masi Dud” haka sngi ba Ar.

Ka phang pdeng kane ka prokram kalong ‘Animal Health and Productivity’.

Ia kane Ka programme la pyniaid da Ka Dr. Alethea Dympep,SMS (Agril. Extension), KVK Jaintia Hills. La ai ia ka ktien pdiang burom da u Dr D. Pasweth, Senior Scientist and Head KVK Jaintia Hills.

Ha kane Ka programme la ai jinghikai iaki ki nongrep jong ka Jaintia Hills halor Ka phang “Ki Masi dud: Ki pynrap ia ka iohnong ha ka rep ka riang bad ki jingri da u Dr. R Suchiang, SMS (AH & Vety),KVK Jaintia Hills.

Ula pynshlur ia ki Nongrep ba kin shim ia ka kam ri masi kum ka lad ban seng kam bad ban pyndap ia ka jingdonkam jong ka dud ha ka jylla. Ka la don ruh ka Farmers Scientist Interaction hapdeng ki Scientist jong ka Office KVK bad ki nongrep.

La pynkut ia ka program da ki ktien ai khublei da ka Kong B.Kharbamon, SMS(Horticulture), KVK Jaintia Hills.