Rakhe ka MBSG iaka World Scout Scarf Day

Syllad | The Rising MeghalayaAugust 2, 2023

Ka District Association jong ka Meghalaya Bharat Scouts and Guides, West Jaintia Hills haka 1 tarik Nailar kala rakhe iaka World Scout Scarf Day, kaba ha kane ka sngi kyrpang ba ki dkhot ki barim bad mynta kin pyni sha ka pyrthei iaka jingkyrpang ka scarf da kaba deng. Ka phang pdeng jong ka kalong ‘Our World-Our Future and Gender Equality’.

Iaka jingiakynduhlang la pynlong ha District Headquarter haka jingiashim bynta lang ki Scouts Master, Guides Captain, Rover-Rangers bad ki Scouts-Guides.

Ka thong jong ka World Scouts Scarf Day ka long ban kynmaw burom ia u Lord Baden Powel ia kawei na ki Camping jong ki khynnah Scout kaba long ha u snem 1907 ha Brownsea Island bad ia kane ka World Scout Scarf Day la sdang iaka jingleh burom naduh u snem 2007 ba dei ruh u snem ban leh burom iaka jingdap 100 snem ka jingsdang u Lord Baden Powell iaka Scouts Movement.

U Ohiwot Laloo, District Commissioner Scouts, West Jaintia Hills haka jingkren ula ong ka long sngi sahkynmaw iaka jinglong kordor jong ka Scarf ha uwei pa uwei bad kawei pa kawei ki dkhot jong ka Scouts-Guides Movement namar lyngba ka Scarf lah ban leh shibun ki kam ha ka ban iarap iaki jaitbynriew. Ula kyntu kynpham ia baroh ki dkhot ka Movement ban iatreilang khnang ban lah ban wanrah iaka bha ka miat ka shnong ka thaw, ka imlang sahlang bad ka District ka Jylla baroh kawei.

Shwa kane u Pet Dhar, Jt. Secretary, MBSG, West Jaintia Hills ula ai ki kyntien maitphang katba u Trebor Talang, Asst. District Organizer Scouts ula ai ki kyntien khublei.