Rakhe ka MBS&G West Jaintia Hills ïaka Thinking Day & Founder’s Day

Syllad | The Rising MeghalayaFebruary 23, 2023

Ka Meghalaya Bharat Scouts & Guides, West Jaintia Hills ka la kynmaw burom ïaka sngi kyrpang ka Scouts-Guides Movement kaba tip kum ka Thinking Day & Founder’s Day ha kaba ki Scouts, Guides, Rovers, ryngkat bad ki Unit Leaders ki la wan ïashim bynta haka jingïakynduh lang kaba la long ha District Headquarter haka 22 tarik une u bnai.

U Adiam u Bthuh, District Secretary, Meghalaya Bharat Scouts & Guides, West Jaintia Hills haka jingkren kum u shongknor ula ïathuh shaphang ka nongrim jong kane ka sngi kaba long ka sngi kha jong ki ar ngut ki shi lok kiba seng ïaka Scouts-Guides Movement kiba tip kum u Lord Baden Powell bad ka Olave Baden Powell.

Halor ka mat kyrpang jong kane ka sngi kaba ong “Our Peaceful Feature” ka Doly Lamare Asst. District Organizing Commissioner (G), ka la ong ha kine ki sngi ka jingtynjuh ba har har rukom kala wan tap ïaki briew kaba la pynhiar dor iaka longbriew man briew.

Kumta ka la kyntu ïaki dkhot ka Movement ban long ki nuksa babha ïa kiwei kadei ka kamram jong baroh ki dkhot naduh ki khynnah haduh kiba la san ban wad lad ban wanrah ïaka shongsuk shongsaiñ bad ban long kita ki briew kiba tip ban kheiñkor ïaki jingkyrkhu ka mariang na bynta ka bha ka miat ka mynta, ka lashai bad ka lawei hadien habud.

U Ohiwot Laloo, District Commissioner (S), West Jaintia Hills ula ong, mynshwa la tip ïaka kum ka World Brotherhood Day na bynta ki shynrang bad ka Thinking Day na bynta ki kynthei hynrei mynta ki sngi la tip ïaka kum ka Thinking Day wa ka Founder’s Day.

https://youtu.be/jhc3P6GgUTs

Shuh shuh kum ka jingai mynsiem ïaki dkhot ka Movement ula ai ruh ki kyntien sneng kyntien kraw ïaki da kaba ong haba pynïasoh bad kane ka Movement long ki briew kiba don ka thong ban pyndep ne ïoh ïaki kyrdan bapher jong kane ka Movement nangta kynmaw ruh ïaka burom akor kidei kiba hakhmat.

Ïa kane ka sngi la pynshong shit da ki jingrwai ki jingshad ba la shim bynta da ki Rovers-Ranger bad ki khynnah Scouts-Guides.