Rakhe ka MCSWA iaka lyngkhuh snem ba 40 ka jingshakri ha rilum Jaintia, buh thong ban pynduh iaka jingkyrni drok bad ka shongkha klumar

Syllad | The Rising MeghalayaDecember 16, 2022

Ka Mihmyntdu Community Social Welfare Association (MCSWA) kawei na ki synjuk kaba iarap ban ai jingsumar iaki kyrni haka jingdih pynbuaid la ha u Drok, Kyiad, Kynja nalor kiwei kala rakhe iaka jingdap 40 snem (1982-2022) ka jingshakri jong ka ha Rilum Jaintia  haka sngi Palei.

Ka MCSWA ka dei ka synjuk kaba la seng da ka Dr Joanietta Shullai kaba long ka Director & Founder da ka jingthmu ban iarap bad ai jingsumar ia kiba kyrni ha ka jingdih pynbuaid ba har rukom, ka jingiasyllok bad ki samla kynthei bad shynrang ban lait na ka jingim kaba lyngkar ba kin kylla kaba mut ban lait liat ha ki kam sniew ka imlang ka sahlang.

Mynta ka MCSWA ka dei kawei na ki sentreimon sngewbha kaba trei ban iarap iaki nongdih drok hapoh ka projek MACS kaba la tip kum ka Injecting drug users (IDU) ha West Jaintia Hills District bad East Jaintia Hills District bad ka Female Sex Workers ne ki kynthei kiba shongkha klumar.

Dangshen ka MCSWA kala pyndep ruh sdang Home Health Aide Caregiver ne ka jingsumar ia ki tymmen ki kro hala iing, khamtam kiba ym don nongpeit nongsumar. Ia kane ka Home Health Aide Caregiver la sdang da ka jingai jinghikai iaki samla kynthei bad shynrang da ka jingiatreilang bad ka Meghalaya State Skill Development Society (MSSDS), Government of Meghalaya.

Ia ka jingrakhe dap 40 snem la pynlong ha Salaroh, Jowai ha kaba u ma Brightstar Chyrmang uba dei u MDC ka North Jowai Constituency ula long u kongsan. La iadon lang ha kane ka sngi da u Wilson Dohling DDTI MACS bad u ma Lambor Suchen uba dei u Skill Development Officer ka MSSDS West Jaintia Hills.

U ma Brightstar Chyrmang haba kren ula ong ka MCSWA kala noh ia u synniang kaba bun bah haka imlang ka sahlang, khamtam ia ki khun samla kim bym ioh kam ioh jam. Lyngba jong ka MCSWA bun ki samla kila iohlad ban ieng hala ki jong ki kjat.

U ma Brightstar ula plie ia ka Website jong ka MCSWA.

Kham hashwa jong ka jingialang la ioh ia ka jingpule na ka ktien U Blei bad duwai da u Rev. D. Lyngdoh, ka jingkren pdiang na ka Sunita Suna, la ioh ruh ia ka jingrwai ia ka Theme Song jong ka MCSWA.

La ioh ruh ka jingkren na Dr. Joanietta Shullai ba dei ka Director & Founder MCSWA bad ia ka jingkren ai khublei la ai da A.J. Nongkynrih, Chief Functionery MCSWA.

La sam ruh ia ki tiar sah kynmaw sha ki dkhot ka seng bad kumjuh ia ki dkhot barim jong ka MCSWA. La sam ia ki certificate sha kito kiba la pyndep ia ka jingshah hikai ha ka Tailoring Course bad kumjuh ruh ki ba la pyndep ia ka piggery, beautician, food processing bad fast food vendor.