Rakhe ka NEHU ia ka lyngkhuh sngi iap ba 189 snem u Syiem Tirot Sing

Syllad | The Rising MeghalayaJuly 17, 2024

Ka North Eastern Hill University (NEHU), Shillong ha ka 17 tarik Naitung ka la rakhe ia ka lyngkhuh sngi iap ba 189 snem jong u Tirot Sing Syiem, u Syiem ka Hima Nongkhlaw ha kaba la wan ban iashim bynta lang da ki nonghikai, ki samla pule bad ki staff jong kane ka skulbah.

Kane ka jingrakhe ba la pynlong hapoh ka campus ka NEHU ka long ban kynmaw burom ia u riewshlur uba dei u khlawait ka jaidbynriew Khasi u Syiem Tirot Sing uba la ieng rangbah ban iakhun pyrshah ia ki bor sorkar ka sorkar Bilat.

La pyniaid ia kane ka jingrakhe da ka u Prof. Devendra Nayak, Vice-Chancellor (I/C) ka NEHU, bad la ioh ka jingkren na u Prof S Umdor na ka Department of Economics halor ka khana shaphang ka jingim bad ka jingialeh laitluid jong u Syiem Tirot Sing.

U Col. Omkar Singh (Retd), uba dei u Registrar ha ka jingkren u la ban jur halor ka jingdonkam ban shim ia ki rai kiba dei biang ha ki rukom pyniaid kam da kaba shim ia ka nuksa lyngba ki kam shlur jong u Syiem Tirot Sing na ka bynta ban wanrah ia ka lawei kaba bit ba biang. Nalor kata u la ban jur ruh halor ka jingdonkam ban shim ia ki jinghikai na kiei kiei kiba la jia ha ki por kiba la leit noh khnang ban lah ban tei ia ka imlang ka sahlang ka bym noh shiliang.

Katba u Prof. Devendra Nayak na ka Department Geography ha ka jingkren u la kyntu ia ki nongiashim ban shim ia ki nuksa lyngba ka jinglong jingim bad ki jingialeh jong u Tirot Singh ha ka jingim ka jong ki. U la kyntu ruh ia ki samla pule ba ki dei ban tip halor ki jingnoh synniang jong ki riewshlur bad ruh ban pynlong shuh shuh ia ki kam wad bniah shaphang ki riewialeh laitluid kiba ia ki khana shlur jong ki  la pynduh noh na ki kot histori.

Nalor kata u la kyntu ruh ia ka NEHU Students’ Union (NEHUSU) ba kan lamkhmat ha ka ban pynlong ia ki prokram ki ban ai jingtip shaphang ki riewshlur da kaba kular ruh ba un ai ia ka jingkyrshan kaba pura halor kiba kum kine ki sienjam.

Hashwa kane, u Toniho S Kharsati, General Secretary ka NEHUSU u la ban jur ia ka jingdonkam jong ka jinglaitluid, ka jingbishar hok, bad ki kam babha hapoh bad shabar jong ka NEHU campus, da kaba kyrshan ia ka jingroi kaba pura kaba la pynshlur da ka jingim jong ki nongialeh laitluid.