Rakhe ka Rotary Club Jowai ia ka Shiksha Sammam 2020

Syllad | The Rising MeghalayaSeptember 20, 2020

Ka Rotary Club Jowai kum shibynta ban pyntyllun ia ki kam kat kum ki rukom jong ka Rotary of International ha kane ka 19 tarik September 2020 ka la rakhe ia ka Shiksha Sammam 2020 ba long kawei na ki mat treikam ba la mang kyrpang ban kyntiew ia ka pule puthi kum ha kaban ai jingiarap ia ki khynnah ba wan na ki longiing long sem ba duk, ban pynduh jait ia ka jingdon ki khynnah ba khlem leit skul ne bym nangthoh nangpule bad kiwei kiwei.

Ha une u snem hapdeng ka jingtynjuh jong ka khlam Covid-19, ka Rotary Club Jowai kum shibynta ban rakhe ia ka Shiksha Sammam ka la shim ban pynkup burom ia ka Dr. Rihunki Jones Toi, Principal Jaintia Higher Secondary School, Jowai ba long kawei na ki nonghikai ba la aiti ia ka por ha ka ban phrang bad saindur ia ki khynnah bad ruh ban pyniaid ia ka skul ba long ka shlem ai jinghikai bad jingnang jingstad ia ki khynnah ba wan na ki shnong ki thaw bapher jong ka District.

Ia ka jingialang pynkup burom la pynlong ha Infinity Hall, Mooralong ha ryngkat ka jingiadonlong ki dkhot ka Rotary Club Jowai bad u B.D Marak, Superintendent of Police, west Jaintia Hills District kum u kongsan.

U Rt. S.K Lato (MPHF) President Rotary Club Jowai kum u shongknor jong kane ka jingialang u la ai ki khanna lyngkot shaphang ka Rotary of International bad ruh ki kyntien maitphang halor ka thong jong kane ka prokram bad kiwei de ki dkhot ka seng kiba la iadon byntalang ha kane ka prokram ki long ka Rtn. T.Tongper, Director Club Service, u Rtn. D.F.Majaw (PHF) Charter Member, ka Rtn. S Tariang (MPHF) Chairperson Literacy, u Rtn. S Laloo, Secretary Rotary Club Jowai bad ka Rtn. Ester F. Gatphoh, Charter President.

Ka Dr. Rihunki Jones Toi ha ba ai jingkren na ka bynta ka burom ba ka la ioh kam lah khlem da ai ka jingsngewnguh ia ka Rotary Club Jowai, ia ki nonghikai kiba la btin lynti abd ai mynsiem ia ka ia ka na ki por sha ki por. Kum kawei na ki nonghikai ba la ioh ia kane ka burom ha ka jingrakhe ia ka Shiksha Sammam jong une u snem, ka ong ban long ka nonghikai ka long kaei kaei ka kam ba bha bad sngewtynnad tam namar lyngba kane ka kam lah ban iadonbynta bad ai ka jingshakri bad saindur ia ka lawei ki khynnah skul.

U B.D Marak, Superintendent of Police ha ba ai jingkren kum u kongsan u la kitbok kitrwiang ia ka Dr. Rihunki Jones Toi bad ruh ia ka Rotary Club Jowai ba kin dang iai imsngi ban leh ki kam ba bha ia ka imlang sahlang jong ki nongshongshnong. Kum u briew ba la ju don bynta ha ka kam hikai, u la ong kumba ngi iapher ha ka dur, ki khynnah ruh ki don la ka jong ka jinglah ne ka jingmut jingpyrkhat hynrei kaei ka ba donkam ka long ba kum ki nonghikai ki dei ban nang kumno ban saindur ia ka lawei ki khynnah.

Haba pynkut ia ka jingkren u B.D Marak u ai ka khubor sha ki nonghikai ba kynmaw ba long ki nonghikai batbit ha khmat ka pyrthei, dei ban long ki nonghikai balah shisha ban tynrong bad btin lynti khamtam ia kito ki khynnah ba don hapdeng ka jingduna ne kiba kham shadien ha ka jingpule puthi jongki.