Rakhe ka Sein Khynroo Dorbar Chnong Khimusniang iaka WED da ka jingthung dieng

Syllad | The Rising MeghalayaJune 4, 2022

Kum shibynta ban rakhe iaka World Environment Day (WED), ka Sein Khynroo Dorbar Chnong Khimusniang kala pynlong iaka jingthung dieng ne ka Tree Plantation bad kala lah ban thung haduh 105 tynrai ki dieng haka sngi Saitjain.

Ia kine ki dieng la thung hapoh u pud u ang ka shnong.

Shuwa ban thung iaki dieng la don ka jingialang kaba lyngkot kaba long ha madan basketball ka Khimusniang haka jingpyniaid u Chairman Sein Khynroo Dorbar Chnong Khimusniang, u Khrawbor Bang haka jingiadonlang u Waheh Chnong, Dorbar Chnong Khimusniang, u ma A Lamare kum kongsan, u Assistant Waheh Chnong, u ma JM Pohsngap kum symbood kongsan bad ki dkhot ka Sein Khynroo Dorbar Chnong Khimusniang.

U Ma Lamare ula iathuh ba 50 snem mynshuwa ka Theme WED kalong ‘Only One Earth’ bad kane ka kdew ba United Nation ka sngewkhia bad pynpaw ruh ba ka don tang kawei ka pyrthei wat la ngi im hala ka jong jong ki ri. Ula ong ruh ka jingrakhe iaka WED ka dei ban ialap ban pynsngewthuh kumno ban tyngkai iaki lai phew jingthaw ha ka sla pyrthei.

U Waheh Shnong ula ai ka jingiaroh iaka Sein Khynroo Dorbar Chnong Khimusniang kaba la shim iaka sienjam ban thung iaki dieng ban wanrah iaka jingjyrngam ka shnong ka thaw.