Rakhe ka Seiñ Kyntu Seiñ Raij 12-Daloi ïaka lyngkhuh sngi ïap ba 157 U Kiang Nangbah

Syllad | The Rising MeghalayaDecember 30, 2019

JOWAI: Ka Seiñ Kyntu Seiñ Raij 12-Daloi ka la pynlong iaka jingrakhe iaka lyngkhuh sngi iap ba 157 u Khawait ka Ri Jaintia u Woh Kiang Nangbah ha kti ka Sorkar Phareng ha u tyllai phasi.

Iaka jingrakhe la pynlong ophis treikam jong ha Thadmuthlong-C Phramer West Jaintia Hills District. Haka por mynstep ka la don ka jingiakynduh lang ki khun jong ka Seinraij Muthlong bad ki dkhot nongkitkam na ki tnad Seinraij bapher bapher haka Bair Seiñraij Muthlong bad ha kaba la ioh iaka nguh Blei da u samla Pynshngain Pasi naka Seinraij Nangbah.

Hadien kane ka la sdang da ka jingiaid paidbah naduh na Biar Seinraij Muthlong shaduh ka ophis treikam ka SKSR -12 Daloi ha ryngkat ka risa ka kynhoi bad ka kynud phawar.

U President ka Sein Kyntu Seiñ Raij-12 Daloi u Rgh Wom Chyrmang ula pyniaid iaka jingialang ha kaba la buh ia u syntiew haka dur mot u Woh Kiang Nangbah ha phyllaw ka ophis treikam ka SKSR -12 Daloi da u Rgh Meliyo Lyngdoh uba long ruh u President ka Seiñraij Muthlong ha ryngkat u Rgh Wom Chyrmang President ka SKSR-12 Daloi bad pynbud ka jingbuh syntiew da ka Seiñraij Mukhla bad ka Seiñraij Muthlong.

Hadien kane la pynher ia ka lama ka seng da u Dr. GL Niang uba long u Ex-President ka Seiñ Kyntu Seiñ Raij–12 Daloi bad la ioh ruh Nguh Blei da u Rgh Moses Lyngdoh u Langdoh Niam ka Raij Dienchynrum.

La ioh ruh ki kyntien pdiang burom da u Kamailad Susngi Chairman Art & Culture Committee SKSR-12 Daloi bad iaka jingim jong u Kiang Nangbah la kren da u Rgh Barding Sari na ka Seiñraij Mukhla.

La ioh ka jingshad lariti tynrai, ka jingshad Pastieh na ka Seiñraij Nangbah, ka shad kyllain wait na ka Seiñ Raij Mukhla, ka shad tynrai ki khun ki hajar ka Seiñ Muthlong na ki kyntoit dong bapher bapher, ka jingshad na ki khun samla ka Seiñraij Shangpung Khliehmuchut Moolibang bad na ki longkmie ka Phramer.

Ka Seiñ Kyntu Seiñ Raij–12 Daloi ka pyllong ruh iaka jingiasiat khnam pyllah ha phyllaw ka ophis ka Seiñ Kyntu Seiñ Raij–12 Daloi ha kaba la ioh nyngkong da u Rgh, Langmet Phawa na ka Seiñ Raij Shnong Sabahmuswang Raij Tuber, ba Ar da u Rgh Klin Shylla na ka Seiñ Raij Shnong Mihmyntdu Raij Tuber bad ba Lai da u Rgh Barket Tang na ka Seiñ Raij Muthlong.

Hashwa kane kata haka 29 tarik ka Khynroo Khylood Committee ka SKSR-12 Daloi ka pynlong iaka Extempore speech ha kaba u Kathauni Ymbon ula wan haka kyrdan kaba nyngkong, ba Ar u Ruhi Lamare na ka Seiñ Raij Shangpung bad Lai u Trehikular Suchiang na ka Seiñ Raij Muthlong.

Iaki khusnam sha ki nongjop la sam da ki riew rangbah bad longkmie bad ha ka bynta kaba ku la ioh iaki kyntien ai khublei na u Rgh Treyo Lyngdoh na ka Seiñ Raij Mukhla uba long ruh ha ka juh ka por u Treasurer ka Seiñ Kyntu Seiñ Raij -12 Daloi bad la pynhiar iaka lama ka Seiñ da u Rgh Manbha Lamare na ka Seiñ Raij Shangpung.