Rakhe ka Seinraij Higher Secondary School iaka jingiaid lynti ba 60 snem

Syllad | The Rising MeghalayaDecember 9, 2024

Ka Seinraij Higher Secondary School, Jowai haka 9 tarik Nohprah ka la rakhe iaka Diamond Jubilee ne jingdap 60 snem (1964-2024) ka jingïaid lynti ha kaban sam iaka jingnang jingstad ha sor Jowai bad ki shnong ba marjan.

Ha kane ka sngi la donlang ka Jt. Director of School Education & Literacy bad Incharge DSEO West Jaintia Hills District Kong AP Syiem kum ka kongsan, ka District Mission Co-ordinator, West Jaintia Hills District, Jowai ka Kong M Lakiang kum ka symbud kongsan.

Ka Kong AP Syiem haka jingkren, kala pyrto iaka jingai jingshakri jong kane ka skul na ka bynta ban kyntiew iaka pule puthi jong ki khynnah najan najngai.

Haba kren aimynsiem iaki nonghikai, ka Kong Syiem kala ong, ‘Ka lawei jong ka imlang sahlang, ka District, ka jylla bad ka pateng ban dangwan la pynshong nongrim lyngba ki nonghikai kiba pynwandur bad saindur iaka jingim jong iwei pa iwei ki khynnah skul”.

Kala pynshlur ruh iaki khynnah skul ban kitkhia haki jingpule ki jong ki, khamtam hakum kane ka juk jong ka jingialeh kaba ka jingnang jingstad ne kata ka Sceince & Technology ka donkam bha iaki khynnah ban trei shitom.

Ka Principal jong ka skul ka Kong Wompher Laloo haba pynsngew iaka histri jong ka skul, kala ong ba la sdang na ka ME Section ha u snem 1964 bad ha u snem 1970 la sdang iaka Primary Section. Ha u snem 1984 la pynkiew kyrdan shaka High School kaba tip mynta kum ka Secondary Section. Ha u snem 1994 haka por ka jinglong MLA u Dr. RC Laloo iaka Secondary la pynkiew shaka Deficit pattern bad ha u snem 1996 la ioh iaka jingithuh kaba pure iaka skul da ka tnad Education ka sorkar Jylla.

Hashwa kane la ioh ka jingkren pdieng na u Ma Mariyoo Rymbai Headmaster UPS Secretary Diamond Jubilee, ki jingkren na u Secretary SMC Ma CA. Ram Kyndiah bad ki kyntien khublei na ka Kong E. Shilla Head Teacher Lower Primary School.

Ha kane ka sngi la donlang ruh nongialam bad nongkitkam ka Seinraij Jowai, naduh u President Ma Hercules Toi, General Secretary Ma Arwotki Sumer, Pator Raymond Nartiang, Head Teacher barim Ma Ram Paswet, ki nonghikai, ki khynnah skul ki dkhot SMC nalor kiwei kiwei.

Ia kane ka sngi la pynphuh pynphieng da ki jingshad jingrwai ba la shim bynta da ki khynnah skul.

Ia kane ka jinglehkmen Diamond Jubilee yn pynkut haka 11 tarik Nohprah, ha u Deputy Chief Minister ka Jylla Ma Sniawbhalang Dhar un long u kongsan haka jingiadonlang u MLA Jowai Ma Wailadmiki Shylla.