Rakhe ka skulbah Northeast Adventist iaka World PT Day

Syllad | The Rising MeghalayaSeptember 9, 2022

Ka Northeast Adventist University, Khliehtyrshi haka sngi Palei kala rakhe iaka World PT Day ne Physiotherapy Day ban ialap iaka jingkongsan ka Physiotherapists ban pynthikna ba u briew u ioh iaka koit ka khiah bad uba bit biang haka met ka phad.

Ïaka jingïalang la pynïaid da ka Phiralynn Kharkongor haka jingdonlang u myntri ka sorkar Jylla u Kyrmen Shylla, ka Dr.Andrea Shylla Orthopedic Physiotherapist District Early Intervention Centre Jowai, ka Dr.Jemima Marak Liaison & Development Officer NEAU, Dr Paul Bhaggien Vice Chancellor NEAU bad kiwei kiwei.

U Ma Kyrmen Shylla haka jingkren ula ïaroh ïaka Northeast Adventist ba lyngba ka jingleh burom jong ka ïa kane ka sngi, ki paidbah ruh ki tip ïaka jingshakri ba kyrpang jong ki bad u sngew ba ïa u shimet ruh u ïoh jingmyntoi ban don bynta lang ha kane ka sngi.

Kum u briew uba don bynta ka seng saiñ hima sima u sngew ba u hap ban peit ïaki kiba bun ki jingeh haka imlang sahlang bad u khmih lynti ba da ka jingïatreilang yn lah ban pynjem ïa shibun bah ki jingeh la kadei haka liang koit ka khiah bad kiwei, la ong u Ma Shylla.

Hashwa kane na ka liang ka NEAU ka la pynsngewthuh ïaki paidbah lyngba ki presentation haba ïadei bad ka Osteoarthritis ne ka jingpang mat, ka Dr.Junita Kyndait (PT) Hod Physiotherapy Department NEAU haka jingkren lamkhmat ka la ong ba kane ka jait jingpang ka ju ngat bha haki briew kiba la heh rta.

U Dr.Nichwa LS Nongtdu Asst Professor NEAU & NEACON ula batai halor ka phang Pathophysiology & Medical Management of O.A, u Dr.Amedwent Kyndait (PT) Assistant Professor, NEAU, ula batai halor ka phang Physiotherapy Management of OA katba ka Dr. Eusivia Pasi (PT) consultant clinic Physiotherapist Ialong Civil Hospital kaba long ruh ka Asst Professor NEAU ka la batai halor ka phang Prevention & advice for OA.

Ka Dr. Andrea Shylla kum ka Physiotherapists ka la pynpaw ba ka dap da ka jingkmen ban trei ïa kane ka kam namar ba ka ïoh ïaka lad ban ïarap ïaki briew ba kin ïoh biang sa shisien ïaka jingim kaba kmen bad laitluid.

“Lada ngi don ha kano kano ka bynta ban ai ka jingkoit jingkhiah ïaki paidbah, ka lah ban dei kum ki Therapist, cardiologist, surgeon, medical specialist bad kiwei hynrei lada don ka jingsngewhun ïaka kam kaba ngi trei ne ym don ka jingsngewïajan bad ki nongpang, ka pyni ba ma ngi hi ngi la bakla ban long kita ki briew ban ai ka jingshakri haba ïadei bad ka jingkoit jingkhiah ïaki paidbah”, la ong ka Dr. Andrea.

Ha kajuh ka por ka pynpaw ka jingkmen ba ka Physiotherapists course kadei kaba la don hapoh kane ka skul bah, ha kaba ki khynnah ka District kiba don ka jingangnud ïa kane ka laiñ kim donkam shuh ban leit shajngai nalor ba ka pynduna ïaka jinglut jingsep jong ki kmie ki kpa.

Ha kane ka sngi la plie ruh ïaka Electro Therapy Lab bad sam khusnam ruh sha ki nongjop haka jingïakop poster competition.

Haka por janmiet ka la don ka Free Health Check Up na bynta ki nongshong shmong ka Khliehtyrshi kiba la wan shim bynta kumba 21 ngut.