Rakhe ka tnad rep riang ïaka sngi dap jingbam & hikai ban tyngkai iaki symbai jingthung
JOWAI: Ka tnad kam rep kam riang jong ka West Jaiñtia Hills District kaba kynthup ïaka District Agriculture Office, District Horticulture Office, ATMA bad KVK kila rakhe ïaka sngi dap jingbam ne ka World Food Day kaba la rakhe manla u snem haka16 tarik u bnai Risaw.
Ka tnad kam rep kam riang kala rakhe ïa kane ka sngi dap jingbam bad ban ïakhun iaka jingshah thngan ha Farmer’s Training Hall, Horticulture Hub, Thadlaskein, Mukhla. Ka phang pdeng jong kane ka jingrakhe ka long “Our Actions are our future- Healthy Diet for #Zero Hunger World.”
![](https://www.syllad.com/wp-content/uploads/2024/09/JIT-Vacancy-823x1024.avif)
U PK Boro, Project Director ka DRDA, West Jaiñtia Hills District ula long u kongsan haka jingïadonlang u Bah W Marbniang, DAO, West Jaiñtia Hills, D Lamar Assistant Director DAO, Risa Lyngdoh na ka KVK Jaiñtia Hills bad kiwei kiwei ki ophisar ka kam rep kam riang.
U PK Boro haba kren kum u kongsan ula ong ba ki nongrep ki don ka bynta kaba kongsan ban pynduh jait ïaka jingshah thngan ki nongshong shnong ka ri. Ka Ri India na ka bynta ban pyllait iaka ri na ka jingshah thngan ki nongshong shong kala pynshlur ïaki nongrep ban rep bun jait bad ban rep khlem khleh dawai bad kala sdang ruh ïaka Food Security Act ban pynthikna ban dap bam ki nongshong shnong ka ri.
U PK Boro ula ong bun jait ki symbai jingthung kila duh jait ha kane ka thain bad ula banjur ïaki nongrep ban ïakhun ban pynneh pynsah ïaki symbai naduh u kba, ki jhur bad kiwei kiwei kiba ïoh na kane ka thain khnang ban biang ka bam ka dih jong ki nongshong shnong.
Ula kyntu iaki nongrep ban leh ïa kaei kaba ki ioh jinghikai na kane ka jingrakhe ban pynbiang bam ia u nongshong shnong.
U Bah W Marbniang haba kren waiphang ula iathuh ba 150 tylli ki ri ki rakhe ïa kane ka sngi namar ba haduh 820 million ngut haka pyrthei ki don ha kata ka jingbym biang ka bam ka dih bad kane ka ktah ïaki kynthei ki khynnah bad kane kala wanrah ruh iaka jingiap thngan.
La rakhe ia kane ka sngi ban ialap iaka jingkongsan ka jingpyndap bam namar ba lada dap ka bam ka dih ka iarap ban pynkiew iaka ioh ka kot jong ka ri. Ban hikai iaki nongshong shnonmg ban bam ki jingbam ba tei bad ban lait na ki har rukom ki jingpang.
Mynta namar ka jingbunkam u briew bad ka rukom im, u briew uym don por ban bam iaki jingbam ba tei iaka met bad la bam ha ki dukan fast food, ki dukan ha surok kaba wanrah pynbam iaka jingp[ang dap lyer, shini, khleiñ, mluh kaba ktah iaka koit ka khiah u briew.
Kane ka jingpynmlien ban bam iaki jingbam bala shet ki briew ha ki dukan ka wanrah pynban iaki jingpang jingpang bymiabit kum ki jiingpang klongsnam, kiew ka shini bad cancer bad kiwei kiwei. Nalor kata ka jingsngaid bad ka jingraikhoh na ka jingbym biang bam ka ktah kumba iwei na ki Lai ngut ki briew bad kane kan kiew shuh shuh.
Shuh shuh u Bah Marbniang ula ong ba ka koit ka khiah jong ka khyndew ruh kala shah ktah na ka jingkylla ka mariang bad kane ruh ka ktah iaka rep ka riang bad ka wanrah ka jingduna noh kita ki symbai tynrai kiba don haka pyrthei bad ban iakhun ia kane ka donkam ban tyngkai iaka mariang bad ki jingthung jingtep khnang ban biang ka bam ka dih.
Ula ong ruh ba ka jingbam kan wanrah iaka jingim ba shait ba khlaiñ bad pynduna ha kaba ioh iaki jingpang kiba bunjait. Kine ki jingbam kiba tei ia ka met ki kynthup iaki kynja soh, ki jhur, ki kynja dai, ki shyieng soh kum ki badam, ki kynja khaw, riewhadem bad ki jingbam kiba duna haka khleiñ, shini bad mluh.
Kumta ka donkam ïa uwei pa uwei ban bam iaki symboh jingbam ki tei bad nang ka rukom khnang ban lah ban tyngkai iaka bam ka dih.
Ki nongkren kila kyntu ïaki nongrep ban tyngkai ïaka bam ka dih bad ki jingthung khnang ban dap biang ka bam.
Hadien ka jingialang plie la don ka jingai jinghikai ïaki nongrep kaba la wan ai jinghikai da ka tnad ka koit ka khiah, ICDS, District and Local Research Station and Laboratory, Jowai.
Leave a Reply