Rakhe ka tnat pynneh riti ia ka Azadi Ka Amrit Mahotsav ha Nongkhlaw

Syllad | The Rising MeghalayaAugust 29, 2022

Ha ka prem miet jong ka sngi Nyngkong, ka North East Zone Cultural Centre (NEZCC), Dimapur kaba long kawei na ki shnat treikam jong ka Ministry of Culture ka Sorkar India ha ryngkat ka jingiatreilang bad ka tnat Arts and Culture ka jylla Meghalaya kala pynlong ia ka prokram jong ki jingrwai bad jingshad tynrai kum shibynta jong ka jingleh burom ia u riewshlur ialeh laitluid ka ri, U Tirot Sing Syiem ha ka jingrakhe ka Ri India ia ka Azadi Ka Amrit Mahotsav kaba long ka jingrakhe ha salonsar ka Ri India ia ka jingdap 75 snem jong ka jingialeh laitluid jongka.

Ha kane ka prokram ia kaba la pynlong ha Khasi Patriotic Home, Nongkhlaw la wan ban sakhi da u Lamphang ka Iing Dorbar Thaw Ain ka jylla, u Bah Metbah Lyngdoh uba la wan kum u kongsan ha ka jingdon ryngkat u Syiem ka Hima Nongkhlaw, u Pa’iem P.M Syiemlieh, u Additional Deputy Commissioner ka Eastern West Khasi Hills District, u Bah A. Nongbri, u Superintendent of Police ka District, u Bah M. B Syiem,  Assistant Director ka Directorate of Arts and Culture, Kong D. Kharjana, u Syiem Khynnah ka Hima Nongkhlaw, u Bah K. M Syiemlieh, ki dkhot ka kur Syiemlieh, u Sordar ka shnong Nongkhlaw, u Bah Clement Dkhar, ki khynnah skul bad ki paidbah nongshongshnong ka shnong Nongkhlaw.

Ha ka jingkren jong u kum u kongsan, u Lamphang ka Iing Dorbar Thaw Ain ka jylla, u Bah Metbah Lyngdoh u la ong ba ka jingrakhe ia ka jingkhraw u Tirot Sing Syiem lyngba ka jingrakhe ka Ri India ia  ka Azadi Ka Amrit Mahotsav ka pynkynmaw ia ki paidbah nongshongshnong ia ka mynsiem ba shlur bad bym aili jong ki riewialeh laitluid ka ri bad ka pynioh ruh ia ka lad ka kabu na ka bynta ki paidbah nongshongshnong ban pyrkhat halor u synniang u bynhei uba ki lah ban noh kum shibynta ban kyntiew ia ka bha ka miat jong ka imlang sahlang lyngba ki sap ki talen ba u Blei u la ai ha ki.

Ha kane ka sngi, u Bah Metbah u la khot la wer ruh ia ki paidbah kiba la sakhi lang ia kane ka prokram ba kin ring jingmut na ki jinghikai jong ka jinglong jingim u Tirot Sing Syiem uba la iakhun dohiap pyrshah ia ki bor ka sorkar phareng ban pynneh pynsah ia ka kolshor bad ka snap kyrpang jong ka ri lum Khasi.

La pynphuh pynphieng ia kane ka prokram da ki jingrwai tynrai, jingshad tynrai bad ruh ka skit halor u Tirot Sing Syiem da ki riewdonsap ka distrik bad kumjuh kiwei de kiba la wan na nongbah Shillong.

Kiwei kiwei pat kiba la kren ha kane ka prokram ki kynthup ia u Syiem ka Hima Nongkhlaw, u Pa’iem P.M Syiemlieh bad i Assistant Director ka Directorate  of Arts & Culture, i Kong D. Kharjana.  (SDPRO,Mairang)