Rakhe ka tnat Textile ia ka “National Handloom Day 2023” ha ka jylla, sam iaki khusnam sha ki kynhun bad ki riew shimet ba tbit pynmih tiar

Syllad | The Rising MeghalayaAugust 7, 2023

Ka Tnat Textile ka sorkar Meghalaya ha ryngkat ka jingiatreilang bad ka National Institute of Fashion Technology (NIFT), Ministry of Textiles, Government of India mynta ka sngi ka la rakhe ia ka “National Handloom Day 2023” hapoh NIFT, Shillong Campus, Umsawli ha ka jingiadon lang u Bah Paul Lyngdoh Myntri ka tnat Textile kum u Kongsan bad u MLA ka Nongbah u bah Mayral Born Syiem kum u Symbud Kongsan.

Haba kren kum u Kongsan ha ka jingialang u Bah Paul Lyngdoh u la khot halor ka jingdonkam ban shim lang ia ka jingkitkhlieh na baroh ki kynhun kiba ia don bynta na ka bynta ban pyndonkam hok ia ka sap ka phong kaba U Blei u la ai kyrpang sha ki nongshna bad nongthain kti ka jylla.

U la pynpaw ruh ka jingkmen ban tip ba ki pateng kiba lai napdeng kine ki nongshna bad nongthain kti ki la ia don ryngkat lang ha kane ka prokram bad pynshlur ruh ia ki ba kin iai bteng ia kine ki jingtrei jingktah jong ki pateng kiba la leit noh.

Haba pyntip ba ki mar bad tiar ba la shna bad thain na kane ka jylla ki la ioh pdiang ka jingiarap na ki ri Europe bad kiwei pat ki bynta jong ki ri ka pyrthei, une u myntri u la khot ia kine ki riew don sap ba kin nangpyndonkam hok ia ki sap ki phong ki jong ki khnang ba kin lah ban ia aireng ha ki jaka iew jong ki ri ka pyrthei.

Katba na ka liang u Bah Mayral Born Syiem ha ka jingkren ula kdew halor ka jingdonkam ban don ka jingpynithuh ia ka tynrai jong ki jain Ryndia khnang ba kan long ka jingmyntoi ha ka ban pynneh pynsah ia ka tynrai. Nalor kata u la iai ban ruh halor ka jingdonkam ban pynneh bad kyntiew ia ki kam shna jingshna bad thain kti hapdeng ki riew donsap ka jylla.

Ha kane ka prokram la sam ruh ia ki  Pehchan Card bad ki Yarn hapoh jong ka Income Generation Programme sha ki nong ioh jingmyntoi da utei u myntri bad ki heh sorkar. Nalor kata la sam ruh ia ki khusnam sha ki riew shimet kumjuh sha ki  Co-operative Society ka jylla.

Ka khusnam Best Co-operative Society ka leit sha ka Mukhap Handloom & Handicraft Co-operative Society, West Jaintia Hills District; Best Handloom Entrepreneur sha ka  M/s Nangcwa Diwon, Ri-Bhoi District; ka khusnam Successful Independent Weaver ka leit sha ka  Ivy Lorna R Marak, West Garo Hills District; ka khusnam Efficient Weaver of Departmental Centre Award ka leit sha ka Manju Rabha, East Khasi Hills District ka khusnam Longest Serving Weaver ka leit sha ka Menri A Sangma, West Garo Hills District.

Shibynta jong kane ka prokram, na ka liang u Kongsan lem bad kiwei pat ki heh sorkar kiba la ia don lang ki la pyllait ruh ia ka  Coffee Table Book halor ka Meghalaya Silk ba la ai kyrteng“Woven Narratives” bad la pyllait ruh ia ka Textile Map jong ka Meghalaya.