Rakhe ka Tur Shaphrang VO Lumpyngngad ia ka lyngkhuh snem ba nyngkong jong ka

Syllad | The Rising MeghalayaJuly 28, 2023

Ka “Tur Shaphrang” Village Organisation, Lumpyngngad, Amlarem block, West Jaintia Hills haka 27 tarik mynta u bnai ka la ioh ban rakhe ia lyngkhuh snem kaba nyngkong jong ka ha ka jingialang kaba la long ha madan football jong ka shnong.

Ia kane ka VO Lumpyngngad ba la seng ha ka 27 tarik Naitung 2022, la jer kyrteng da ka “Tur Shaphrang, bad hapoh kane ka VO ki don santylli ki SHG kiba iasnohkti lang ban kyntiew ia ka roi ka par ki nongshong shnong, kita ki long ka SHG Shaniah tylli, SHG Iateilang, SHG Ryntihlang, SHG Cjukai dei phrang bad ka SHG Khihmon Sngah Jam.

Ha kane ka jingialang la ia don lang ruh u Bah M. Kharpran, Block project manager (BPM) Amlarem C&RD Block kum u Kongsan bad u bah Medalin Swer kum u Symbud Kongsan kiba la aijingkren nalor kiwei pat ki riew pawkhmat ka thain kum u Bah W.Chyrmang bad kiwei kiwei.

Ha kane ka sngi la ioh ruh ka jingkren na ki nongkitkam ka VO, kiba kynthup ia i Kong Fitby Syrti kaba la pynshai paidbah halor ka khana lyngkot ka VO ha kane ka jingiaid lynti kaba shisnem kynthih, ha kaba ka la ong ruh ba ka VO ka la lah ban pyndep haduh 12 tylli ki kam hapoh kane ka snem, kata naduh ka kam thung dieng, pynkhuid shnong, rakhe Sngi Laitluid (Independence day) bad ka jingai jingiarap ia kiba donkam  jingiarap kum sha ki para shnong para thaw,  haba don ki jingiathoh shongkurim hapoh shnong,ban peit ia ka bha ka miat bad ka suk ka sain hapoh shnong bad kiwei kiwei ki kam babha.

Nalor kata la ioh ruh ka jingkren na u Adviser ka VO u Bah C.Talang uba dei ha ka juh ka por u Waheh Shnong Lumpyngngad.

La wan pynphuh pynphieng ia kane ka program da ka jingwan tuid ki nongshong shnong ba marjan kum na Lumpyngngad, Kharkhana, Pasadwar bad kiwei kiwei ha ryngkat ka jingiadon lang ki kynhun SHG.

Katba ha ka por janmiet la pynlong da ki jingialehkai kum ka musical chair, Arm wrestling, mareh 100 meter shynrang, kynthei bad kiwei kiwei ki jingialehkai nalor ka jingpynkhalai  ia ka Lucky Draw ka VO. Khatduh la ioh ka jingkren ai khublei na ka kong T Pohkyrnu.