Rakhe ka West Jaintia Hills ia ka  World Tuberculosis Day halor ka mat “Yes! We can end TB”

Syllad | The Rising MeghalayaMarch 29, 2024

Ka District Tuberculosis officer, West Jaintia Hills ka la rakhe ia ka World Tuberculosis Day ha ka prokram ba la pynlong haka 28 tarik Lber hapoh District Library Auditorium halor ka mat, “Yes! We can end TB” lane (Hooid Ngi lah ban pynduh jait ia ka jingpang TB) ha ka jingiadon lang u Deputy Commissioner ka District u Bah B.S Sohliya, IAS kum u Kongsan.

Ha ka jingkren u Kongsan u la ai ka jingiaroh ia ki doktor bad ki kynhun jong ki halor ka jingtrei borbah na ka bynta ban pynduna ia ka jingdon jong ki nongpang TB bad halor ka jingbteng ban bteng da ka thong ban pynduh jait ia kane ka jingpang hapoh ka District. Nalor kata u la pyrto ruh ia ka jingtrei shitom jong ki dkhot ka tnat ka koit ka khiah ha kaba iadei bad ki lad aijingsumar, ka jingpynlong ia ki jingwad bniah bad ka jingpyntreikam ia ki prokram aijingiada ban iakhun pyrshah ia ka jingpang TB.Nalor kata u DC u la pynshlur ruh ia ki riew shimet, ki nongshong shnong bad ki kynhun kiba ia don bynta ban iatreilang khnang ban poi sha ka thong jong ka jingthmu.

Ha kane ka prokram u Kongsan u la pyllait ruh ia ka Music Video kaba iadei bad ka jingpang TB ha kaba ka don ruh ia ki khubor kiba iadei bad ki jingialap bad pynshai halor ki lad jingiada bad jingsumar ia kane ka jingpang. 

Na ka liang ka Dr. Evalyneda B V Laloo, District Medical Health Officer Cum District Tuberculosis Officer & DACO bad  Dr. Dasngewhun Shadap, MOTC Jowai ki la ai ka jingkren kaba bniah halor katei ka phang “Yes! We can end TB” bad halor ka jingkongsan jong ka jingrakhe ia kane ka sngi ‘World Tuberculosis Day.’

Ka Dr. Evalyneda ka la iai ban halor ka jingkongsan jong kane ka sngi bad pynpaw ruh halor ki sienjam ba la pyntreikam na ka bynta ban pynduh noh syndon ia ka jingpang TB. DA kaba pynpaw ba kane ka jingpang TB ka dei kaba lah ban iada, ka la kyntu ia ki briew ba kin shim ia ki lad jingsumar ba thikna lada ki ioh ia kane ka jingpang.

Ha kane ka prokram la sam ruh ia ki syrnot bad ki memento da u Kongsan bad kiwei sha kito ki dkhot kum ka jingithuh ia ka jingnoh synniang ka jong ki ha ka jingiakhun pyrshah ia ka jingpang TB.Kane ka khusnam ka kynthup ia  ka TB Free Village Award, SNC certificate/ Mementos, Nikshay Mitra certificate, best treatment supporter, best lab Technicians, best performing ASHA. Media Engagement.

Na ka liang ka ophis ka la pynlong ruh ia ka jingialehkai sport na ka bynta ki khynnah skul LP bad UP ha kaba la sam ruh ia ki khusnam sha ki nongjop ha kane ka jingialang.

Kham hashwa, ka ophis ka la sdang ia kane ka prokram lyngba ka rally ba la wan iashim bynta da ki khynnah skul kiba rah ryngkat  ki plakad kiba don ia ki khubor ialap halor ka jingpng TB bad ki lad jingiada hapoh ka imlang sahlang.Kane ka rally ka la iaid lyngba na  Ladthadlaboh, Newhill, Iawmusiang, DC Office, Stand War bad pynkut ha  District Library Mynthong, Jowai.