Rakhe ka World Environment Day ka Khynroo Khyllood Committee Seinraij Jowai

Syllad | The Rising MeghalayaJune 6, 2023

Ka Khynroo Khyllood Committee Seinraij Jowai ryngkat ka jingiatreilang ka YessMeghalya, ka la rakhe iaka World Environment Day da kaba pynlong iaka jingialang pynsngewthuh halor ka phang “Beat Plastic Pollution with Special reference the Impact of Jowai Town” bad ia kane ka phang la batai da ka riew shemphang ka Kong Nilamroi Passah, Senior Secretary Martin Luther Christian University Shillong.

Iaka jingialang la pynlong ha Yungwalieh ka Chilliangraij ba la pyniaid da u Rangbahmi Kynjin Chairman KKC Seinraij bad la ioh ki kyntien nguhblei na u Kamnipaia Challam bad ki kyntien ai mynsiem bad kyntu kynpham na na u OR Shallam, President Seinraij Jowai bad u Arwotki Sumer, General Secretary Seinraij katba u Sienmi Lato, Secretary KKC Seinraij ula ai ki kyntien khublei.

Ban khring iaka jingmut jingpyrkhat jong ki khynnah skul, la pyni ruh iaka video kaba lyngkot ha kaba iadei bad ka jinglong jingman jong ka mei mariang ha kine ki sngi na kadaw ka jingbymnang u khun bynriew ban kheinkor bad burom iaki jingkyrkhu jong ka.

Ka Nilamroi Passah kum ka riew shemphang ka la ong, ha ki por mynshwa ym ju don ka jingiakren ha kaba iadei bad ka Plastic Pollution, hynrei haki khyndiat snem ka United Nation ka la shimkhia bha ban iakren shaphang ka Plastic Pollution namar ka iohi ba ki plastic kadei ka bih kaba long ka jingpang ymtang iaka mariang wat ia baroh kiba don jingim.

Da kaba pynlong ia kum kine ki jingialang kan iarap iaki khynnah skul kumjuh ki nongshong shnong kumno ban kiar na kaba pyndonkam iaka plastic bad kaei ka jingkyrkhu bad jingmyntoi lada rai kut ban sangeh na ka jingpyndonkam iaka plastic.

Hadien ka jingialang ka Khynroo Khyllood Committee Seinraij Jowai ka la pynlong iaka jingthung dieng ha Khloo Langdoh ba la shim bynta da ki khynnah skul ka Chilliangraij SSA UPS, Chilliangraij Govt. LPS, Loompyrdi Iongpiah UPS SSA, Dulong Govt. LPS, Pohmusiang UPS SSA, Government Girls Hr. Secondary School, Jowai bad ka Panaliar UPS SSA bad ki riew rangbah ka Seinraij Jowai.