Rakhe ka WWO Seinraij Jowai iaka International Women’s Day

Syllad | The Rising MeghalayaMarch 9, 2025

Ka Women’s Welfare Organisation, Seinraij Jowai kala iasnohkti lang ban rakhe iaka International Women’s Day ha ka 8 tarik Lber ha Iung Dorbar Ka Seinraij, Loompyrdi haka jingsakhi lang ka Kong Yoosarda Najiar, District Social Welfare Officer, West Jaintia Hills, u Ma EMH Passah, Vice-President Seinraij Jowai haka jingiadonlang ruh ki riew rangbah ka Seinraij Jowai.

Iaka jingialang la pyniaid da ka Kong Sooneeta Passah, Vice-Chairperson WWO, Seinraij bad la ioh ka jingkren kyrpang na ka Kong Rilistina Pyrbot, dkhot Women’s Welfare Organisation Loompyrdi Iongpiah bad ka jingnguhblei na ka Ribeitki Dkhar, dkhot Women’s Welfare Organisation.

Ka Kong Rilistina Pyrbot kum ka longkmie kala pynpaw ka jingkmen ban iohi ba ki kynthei kila nangkiew ha kiba bun ki liang katkum ka jingiaid ka juk ka por, hynrei wat la katta kala pynkynmaw ba ka jingkiew shakhmat jong ki kynthei kadei lyngba ka jingai mynsiem jong ki shynrang kiba kup iaka kyrdan kum ki Kni, u Kpa, kurim, hymmen, para ne ki khun ki ksiew bad kum ka kynthei ymdei don ka mynsiem ha nga mei hynrei ban kynmaw ba ka burom jong u shynrang kadei kaba hakhmat eh naduh na iing haduh shabar.

U EMH Passah ula ong haka kynthei U Blei ula ai kyrpang ka bor ban kit ban bah iaka lyngkor bakhia naduh na iing haduh haka imlang sahlang, bad ha kum kane ka sngi kyrpang ula kitbok kitrwiang ia baroh ki kynthei ba kin ioh ka jingkyrkhu kaba bha tam ha baroh ki liang.

Ka kongsan ka Kong Yoosarda Najiar, DSWO, West Jaintia Hills kum ka ophisar sorkar kaba don haka tnat kaba trei na ka bynta ki ba bun ki skhim ba iadei bad ka hok ki kynthei khynnah, ka sngew ba ka long kaba donkam ban iathuh hapdeng ki kynthei kumjuh ki longkmie shaphang ki skhim ne ki lad jingiarap kiba ka sorkar ka mang kyrpang na ka bynta ban pynsuk pynsting iaka lyngkor jong ki kynthei kiba long haki dur bad ki rukom bapher.

Ha kane ka sngi la sam khusnam ruh sha ki nongjop haka jingiakop Walkathon bad Marathon ba kynthup iaka Kong Tipki Chyrmang, Panbiang Kyndiah bad Queency Passah, Warisa Sumer, ka Christina Rymbai bad Soodawanki Lakadong. 

Iaka jingialang la pynwai da ki kyntien khublei na ka Kong Ridaka Lamar, Secretary WWO Seinraij.