Rakhe ka YMCA Shillong ia ka “Advent Christmas’

Syllad | The Rising MeghalayaDecember 8, 2023

Ka YMCA Shillong ka la pynlong ia ka prokram shibynta ka jingrakhe ia ka jingwan jong ka Christmas ha ka 6 tarik mynta u bnai hapoh ka hall jong ka Bharat Scouts and Guides ha Laban, Shillong.

Kane ka dei ruh shibynta jong ka prokram ba ka YMCA ka ju pynlong man la ka snem na ka bynta ki khynnah kiba ka ai jinghikai ha ki bynta bapher bapher.

Ha kane ka sngi la ia don lang ruh u Honorary General Secretary u Bah JR Myrboh uba la pdiang sngewbha ia baroh ki Board Members kaba kynthup ia u President  u Most. Rev. Bishop Purely Lyngdoh, Vice-President Dr. CO Rangad, Treasurer Bah Gideon Kharkongor, Regional Secretary Shamir Thabah bad baroh ki dkhot jong ka Board kiba la iadon lang. Nalor kata u la pdiang sngewbha ruh ia ki khynnah pule kumjuh ia ki staff jong ka YMCA Computer Centre.

Ia ka khubor kaba iadei bad ka Khristmas la pynsngew lyngba uwei na ki dkhot jong ka Board uba dei ruh u nongialam niam bad u heh IAS ba la shongthait u Bah Pochister Kharkongor uba la kren halor ka mat ‘Advent Christmas 2023’ kaba dei  ka jingshai jong ka Khristmas ba la shim na ka Gospel u Matthew 4:16.

U la pynkynmaw ruh hapdeng ki nongiashim bynta ba U Blei U long ka jingshai bad U Jisu Khrist u long ka jingshai jong ka pyrthei. Kumta ruh, khlem ka jingkha ia U Jisu Khrist sha kane ka pyrthei kan ym don satia ka jingshai bad ka jingkyrmen na ka bynta baroh u bynriew.

Nalor kata u pynkynmaw ruh ba ka jingkha ia U Jisu Khrist ka dei kaba tang ma u hi uba dei u nongpynim jong jong ka pyrthei. U ai ka jingkular na ka bynta ka jingmap noh ia ki pop na ka bynta baroh kito kiba pdiang ia u kum u Blei bad u Nongpynim.

La pynphuh pynphieng ia kane ka prokram lyngba ki jingrwai Khristmas bad carol na ka samla pule computer bad kiwei pat.