Rakhe lyngkhuh snem ba 25 ka Pnar Thor Sepngi Presbytery

Syllad | The Rising MeghalayaNovember 14, 2022

Da ki spah ngut ki riewngeit ka Balang Presbyterian ki la wan tuid sha ka jingrakhe ïaka lyngkhuh dap 25 snem ka Pnar Thor Sepngi Presbytery kaba la rakhe haka Balang Kmie ha Ratacherra ha ka sngi U Blei.

Ïaka jingdap 25 snem la sdang ban rakhe naduh ka 11 tarik haduh 13 tarik halor ka phang “To batskhem ïa kata kaba pha don”.

Haka Sngi U Blei

Haka Jingïaseng kaba la long haka por 10.00 baje mynstep la pynïaid da u Rev LS. Pohkshang Moderator Pnar Thor Sepngi Presbytery bad ïaka khubor na ka Ktien U Blei la sam da u Rev I S. Majaw.

La ïoh ki jingrwai choir na ka Jingïaseng Samla Balang U Blei, Jingïaseng Samla Balang Kayang bad Jingïaseng Samla Balang Katlicherra District.

Katba haka jingïaseng paidbah kaba la long ka nohphai sngi, ïaka khubor na ka Ktien U Blei la sam da u Rev WC. Khongwir Ex Moderator General Assembly, PCI, uba la pynshong nongrim haka Jingrwai Sngewsynei Lyngnong 3 dkhot 22, 23.

“Ka long na ki jingisynei U Trai ba ym shym la bam duh ïa ngi, naba ki jingsngewsynei jong u kim duh. Ki long kiba thymmai man ka step, kaba khraw ka jingïaineh jong me”.

La ïoh ka jingrwai choir na ka Jingïaseng Samla Balang Umkiang, Jingïaseng Samla Balang Ratacherra bad Jingïaseng Samla Balang Karimganj District.

Khyndiat shaphang ka histri lyngkot jong ka Pnar Thor Sepngi Presbytery ba la ïathuh da u Rev LS. Pohkshang la ong ba haka jingshisha ïaka jingrakhe Silver Jubilee, ka Presbytery ka la ïakut ban rakhe haki tarik long Presbytery kata ha u bnai Kyllalyngkot (January) jong u snem 2022, hynrei la hap ban pynkynriah sha u bnai Naiwieng (November) 2022 namar ba ha u bnai Kyllalyngkot ka dang don ka jingpyrkhing na ka liang ka sorkar ïaka jingïalang paidbah kum ka lad jingïada na ka jingpang corona virus (COVID-19).

Ula ong, ka snem 1997 ka long ka snem sah jingkynmaw haka History ka Balang Presbyterian hapoh Barak Valley hapdeng ki Khasi Pnar. Ka jingïaseng Pnar Thor Presbytery kaba hynriew phew wei kaba long haka Balang Baikam, Cachar Sepngi District haki tarik 7 haduh 9 tarik Kyllalyngkot 1997, kyndit kynsan khlem ka jingthmu lane pyrkhat lypa, khlem jingïakren lypa ha kino kino ki committee, ka mih ka jingkren haka jingïalang pyrkhat kam jong ka Presbytery ba la dei la por ban phiah noh ïaka Presbytery haki artylli ki Presbytery ïa kaba yn khot, ka Pnar Thor Mihngi Presbytery bad ka Pnar Thor Sepngi Presbytery.

Ula ïathuh, hadien ka jingïakren da kawei ka jingmut ka Presbytery ka la rai ban phiah noh bad ban thoh sha ka Synod ba kan leh ïa kaba donkam baroh. Ha kata ka jingphiah la ïakut ba ki Presbytery kin ïa ïoh mar lai tylli ki District. Ka Pnar Thor Mihngi Presbytery kan kynthup ïaka Cachar Mihngi District, ka Bubonhill District bad Hailakandi Mihngi District. Ka Pnar Thor Sepngi Presbytery kan kynthup ïaka Cachar Sepngi District, ka Karimganj Tripura District bad Hailakandi Sepngi District.

Ka District Hailakandi Mihngi kam shym la treh ban ïadonlang bad ka Pnar Thor Mihngi ka kwah hi ban don bad ka Pnar Thor Sepngi. Kumta ka Pnar Thor Mihngi ka don artylli ki District bad ka Pnar Thor Sepngi pat ka don saw tylli ki District.

Haka jingïaseng Synod jong ka KJP Synod kaba la long haka Balang Rymbai haki tarik 12 haduh 16 tarik Lber (March) 1997 ka Synod ka la pdiang bad mynjur ban phiah ïaka Pnar Thor Presbytery haki ar tylli ki Presbytery bad kala jied ïa u Rev PS. Gympad (Ex Moderator) bad Rev DH. Sohklet ban leit thung ïaka Pnar Thor Sepngi Presbytery haka 5 tarik Jymmang (May) 1997 haka Balang Ratacherra kaba dei ka Balang kmie jong ka Presbytery.