Rakhe lyngkhuh sngi ïap ba 159 snem U Woh Kiri Dhar
Ka Seiñ Raij Khynroo khyllud Shangpung Pohshnong ryngkat ka jingïatrei lang ka Jaintia Student Union (JSU) Shangpung Unit ki la kynmaw burom ïaka lyngkhuh sngi ïap ba 159 snem jong u Woh Kiri Dhar uba long uwei na ki khlawait jong ka rilum Jaiñtia uba la shah siat ïap ha ka thma Shangpung ha snem 1862 ha ka por ba ki khun ka Ri Jaiñtia ka dang rhem bha ka jingialeh laitluid na ka kti jong ka sorkar Phareng.
Ïa kane ka jingkynmaw burom la sdang haka 4 tarik da kaba pynlong ïaka Cleaning Drive bad mynta ka sngi la pynlong da ka jingïakop mareh thong ba la ia shim bynta da ki samla samhoi jong ka Shnong Shangpung bad na kiwei kiwei de ki shnong.
Ha ka por 10 baje mynstep la pynlong ia ka suit ka shor da u Daloi bad ki myntri ki khatri jong ka Elaka Shangpung bad la pynbud pat da ka jingbuh syntiew da ka Seiñ Raij Khynroo Khyllud Shangpung Pohshnong, ka tnat Seiñ Raij Khliehmuchut & Moolibang, ka Tnat Seiñ Raij Khliehrangnah, ka JSU Shangpung unit, KSU Shangpung Unit ha u Mot Sahnam u Woh Kiri Daloi Dhar ha Lummukut, Shangpung Pohshnong ha ka jaka ba u shah siat iap.
La pynïaid iaka jingïalang da u Bah Junom Suiam, President ka Seiñraij. Ïa ka jingiathuh khana shaphang U Woh Kiri Daloi Dhar la iathuh da u Heibormi Sungoh u nongthoh kot ba paw ka thaiñ, bad la ioh ruh ia ki jingkren na kitei ki tnat seng bapher bapher bad bud pat da ka jingkren na u Chairman ki Myntri u Bah TS Phyllei bad na u Bah Treilang Suchiang MDC ka thaiñ ha ka jingiadonlang u Bah R. Rabon Waheh Shnong Shangpung Pohshnong.
La pynphuh pynphieng ïa kane ka jingkynmaw burom da ki jingrwai ba la shim bynta da ki khynnah skul jong ka Khad Ar Nor U.P School, Shangpung bad ia ka jingshad Pastieh na ki samla shynrang bad bud pat da u Acting Daloi lem bad ki Myntri ki khatri.
La ïoh ia ka nguh ka dem na u C. Langbang, Acting Daloi, Elaka Shangpung bad la pynkut ïaka jingïalang da ki kyntien ai khublei na u Secretary u Bah Teilang S. Manner.
Facebook
Instagram
Youtube
Twitter
Leave a Reply