Rakhe ‘Mask Day’ ka Mowkyndeng ban iada na u khniang COVID-19

Syllad | The Rising MeghalayaJune 21, 2020

Ban phah iaka khubor halor ka jingkongsan ka jingdeng mask ban iada na ka khlam COVID-19, ka Dorbar Shnong Madankynsaw-Mowkyndeng kala rakhe iaka ‘Mask Day’ haka Sngi U Blei haka shnong Mowkyndeng, West Jaiñtia Hills District.

“Ka mask ka long kaba donkam bha mynta, khamtam haka jingiakhun ban iada naka jingiabit ka khlam jingpang COVID-19. To ngin iada ialade da kaba deng iaki mask,” ong u Waheh Shnong Madankynsaw Mowkyndeng u ma Danny Shadap.

U waheh shnong Mowkyndeng haka jingialam khmat jong u kila rakhe iaka ‘Mask Day’ ban banjur iaki paidbah naduh khynnah haduh rangbah ban deng iaki mask nalor ka jingsait khuid iaki kti da ka sabon bad ka jingjngai iwei na iwei khamtam haki jaka paidbah ha kum kane ka por ba iakhun n aka jingiabit khlam COVID-19.

Haba rakhe iaka ‘Mask Day’ la pynlong ia ki prokram pynshai paidbah halor ka khlam bad la pynlong ki prokram pynbyrngia.

Ka Kong K Synnah kaba dei ka nongtrei ASHA kala pynsngewthuh iaki paidbah halor ka khlam COVID-19 bad ki lad jingiada.

La sam ruh iaki mask ha man ki dong ki shnat bad la iaid paidbah da kaba rah iaki placard ban phah iaka khubor ha kylleng ka shnong iaka jingdonkam ban deng mask da ki dkhot ka Executive Committee Shnong ryngkat ki dkhot ka Village COVID-19 Management Committee.