Rakhe Mother’s Day ka WWC Loomkyrwiang, Jowai

Syllad | The Rising MeghalayaMay 12, 2024

Kum shibynta ban snohktilang bad satlak ka pyrthei, ka Women’s Welfare Committee jong ka Dorbar Shnong Loomkyrwiang kala rakhe iaka Mother’s Day, haka janmiet 11 tarik Jymmang haka jingialang kaba long ha Iungwalieh haka jingdonlang u Waheh shnong Ma Lammat-oo Laloo, Assistant Waheh Shnong Ma Daioolang Pakma, nalor kiwei kiwei.

Iaka jingialang la pyniaid da ka Riwanki Laloo, Member WWC Loomkyrwiang, la ioh ka jingnguh blei na ka Hakanihiwot Lywait Member WWC Loomkyrwiang katba ka Chairpeson WWC Loomkyrwiang Kongka Shullai kala iathuh iaka jingiaid lynti ka Women’s Welfare Committee.

Ka jingkren kyrpang shaphang ka Mother’s Day la pynsngew da ka Samhakani Laloo, Secretary WWC Loomkyrwiang, ka Yoosarda Najiar, Social Welfare Officer, West Jaintia Hills kala iathuh iaki lad jingiarap kiba ka sorkar kala mang kyrpang na ka bynta ki longkmie pun khun bad kiwei kiwei ki lad jingmyntoi iaki longkmie.

Ka Enity Pakma kum kawei kaba shah pynkup burom ha kane ka sngi kala kren ai mynsiem iaki longkmie bad kitbok kitrwiang ruh iaka committee khnang ba kan lah shuh shuh ban leh ia shibun ki kam na ka bynta ka bha ka miat jong ki kynthei bad ka imlang sahlang jong ka shnong ka thaw haki rukom bapher bapher.

Kaba kyrpang shuh shuh ha kane ka sngi ha kaba la ioh ka jingkren kyntu kynpham bad aimynsiem iaki longkmie na u Assistant Waheh Shnong Ma Daioolang Pakma.

Ka la don ruh ka jingpynkup burom kaba kyrpang iaki longkmie kiba la palat 70 snem rta. La pynshongshit bad pynphuh pynphieng ia kane ka sngi da ki jingshad jingrwai ba la shim bynta da ki khun samla bad khynnah.