Rakhe MSRA iaka World Squash Day

Syllad | The Rising MeghalayaOctober 14, 2021

Ha ka sngi Saitjain jong ka taiew kaba la dep, ki dkhot jong ka Meghalaya Squash Racquet Association (MSRA), ki la ia lum lang tang para dkhot ban rakhe ia ka lyngkhuh snem ba 20 jong ka World Squash Day.

Ka jingrakhe ia kane ka sngi da ki khyndiat ngut ki dkhot ka long da ka jingiakob, kaba la long ha ka jaka ialehkai  squash, kaba don marjan bad U Tirot Indoor Stadium, Lower Lachumier.

Na ka liang u bah Andrew Langstieh ba dei u Patron jong ka Meghalaya Squash Raquet Association, u iathuh ba ha kane ka jingiakob ki para dkhot ba lah ban iashim bynta ruh ki long tang kito kiba la dep ban ai pura ia u tika ne Covid Vaccination.

Haba jubab halor ka jingkylli shaphang ka jingdon ki nongialehkai ia ka squash ha ka jylla, u bah Andrew u iathuh ba kat kum ba u la ioh lum jingtip ba ia kane ka jaka ban ialehkai ia ka Squash la shna ia ka ha u snem 1980 hynrei dei tad ha ki snem 1990 ba khlem don shuh ki briew kiban ialehkai.

Haba phai pat sha lade, bah Andrew u iathuh ba u la sdang ban ialehkai ia ka squash ha u snem 1998 ha Gangtok, ha kaba u juh ialehkai bad ki ophisar shipai kaba la pynlong ia u ban sdang ban muja bha ia kane ka jingialehkai.

Dei tad ynda haba u la wan trei sha la ka jong ka jylla, ba u bah Andrew ha u snem 2004, u poi iuh kjat ha kane ka jaka ba mynta, ha kaba u la lap da la ki jong ki khmat ba ka la jan khyllem bad mar mar u la leit ban ia kynduh ia u Director ka tnat sports ba long ha kito ki por, ha kaba la bhah ia ka pisa kaba long 60 hajar tyngka ban shna  biang ia kane ka jaka ban ialehkai ne ka court.

U bah Andrew u sngew kmen ba un iathuh ba naduh utei hi u snem haduh kane ka khyllipmat kaba mynta, ka synjuk ka la don haduh 45 ngut ki nongialehkai bad ka jingialehkai ruh ka la sdang ba kan khring bha ia ki riew ieit ialehkai.

U bah Andrew u la ong ruh ba ka thong ka Meghalaya Squash Racquet Association ka long ban ialeh ban khring ne ban kdup ia ki khun samla ba kin ialehkai, ha kaba mano mano ki lah ban ialehkai, bad kaei kaba donkam ka long tang ka jaka ne ka court bad nalor katta kam dei ruh ka jingialehkai kaba rem kum ka badminton ne tennis, hynrei ia ki nongialehkai kaei kaba ki donkam dei tang ka racquet bad ki shu jur ki juti ban phong ha ka por ba ialehkai.

U Bah Andrew u sngewkmen ban iathuh ba na ka liang u Myntri ba dei khmih ia ka tnat sports u bah Banteidor Lyngdoh ialade ruh uba dei uwei na ki briew ba smat bha ban ialehkai ia ka squash, la ai jingmut ia u ban pynshna biang sa kawei ka squash court ha JN Stadium, Polo, ha ka juh ka por ka synjuk ka juh pynlong ruh ia ki workshop ha kaba ka juh lum lang ia ki khynnah ba kin wan ban iashim  bynta kum ban pynshlur bad ban ai jingbatai kaba bniah sha ki shaphang kane ka jingialehkai.

U Bah Andrew u ong ruh ba ka thong jong ka synjuk nangne shakhmat ynda haba la la kham jah noh u khniang jingpang Coronavirus, kan ialeh ba kan phai ia la ki jong ki khmat sha ki khun samla, da kaba yn pyrshang ban  pynshlur naduh ba ki dang rit kaba dei hangne ynda haba la lap ia ki sap ki phong, yn sain dur ia ki ban long kum ki nongialehkai ba kynsai jong ka jylla bad ban iashim bynta ha ki lympung bah ialehkai ka thain, ha ka ri ne wat ha kiwei kiwei ki jait lympung.

Kyntang ia wai bah Andrew u pynpaw ba kum ka synjuk ka kloi ba kan iaid kylleng ki district ba don ha ka jylla ba kan iaid ia ka lynti ban ialap iawer ia kiwei pat ki paralok bad khamtam ia ki khynnah ba kin wan shakhmat ban sdang ban ialehkai ia ka squash.