Rakhe National Statistics Day ha Jowai

Syllad | The Rising MeghalayaJune 29, 2022

Ka ophis u District Statistical Officer, West Jaintia Hills kala rakhe iaka National Statistics Day halor ka mat pdeng ka “Data for Sustainable Development” haka sngi Balang ha ïing dorbar ka shnong Mynthong, Jowai.

Ka National Statistics Day la rakhe iaka manla ka 29 tarik u bnai Jylliew ha baroh kawei ka ri ban kynmaw burom ia u synñiang u bynhei bala noh u (L) Professor Prasanta Chandra Mahalanobis iaka rukom buh jingkhein bad ka jingsaindur iaka ioh ka kot ka ri.

U Prasanta Chandra u dei u scientist and statistician, u dei ruh u nongseng jong ka Indian Statistical Institute (ISI). Ka 29 tarik Jylliew ka dei ruh ka sngi kha u ne u riewkhraw ban lum jingkhein iaka ioh ka koit, ka roi ka par ka ri. Ka World Statistics Day pat la rakhe ha ka 20 tarik u Risaw ha satlak ka pyrthei man la ka san snem.

Ha ri India la sdang rakhe iaka National Statistics Day naduh u snem 2007.

Ka jingrakhe ia kane ka sngi ka long ban pynsngewthuh sha u paidbah halor ka jingkongsan ka statistics ne ka jinglum jingkhein, ka jingbuh jingthoh haka jingim manla ka sngi bad kumno ban ruid nuksa ne ban thaw lad thaw buit bad wanrah iaka roi ka par.

U Kongsan Ma R Sumer, Deputy Director, Directorate of Economics & Statistics, Meghalaya haba kren ula ong ba ka jingrakhe ia kane ka sngi ka dei ban pynsngewthuh halor ka jingdonkam ka Statistics haka jingim ba manla ka sngi ban lum jingkhein, ban buh jingthoh bad ban wad bniah da kaba thikna bin bin.

Ka tnad Statistics kadei kawei na ka tnad kaba don bynta ha kaban saindur iaka ri bad lyngba ka jingkhein kaba kynthup iaka khanasamari, ka survey ha kaba iadei ka pule ka puthi, ka koit ka khiah, ka rep ka riang nalor kiwei kiwei bad lyngba ka jingkhein kaba lum la ai sha ka sorkar ban ruid nuksa bad thaw lad thaw buit ban shna iaki aiñ ne ki policy ban myntoi ka jylla bad ka ri haka ioh ka kot bad ka roi ka par, la ong u ma Sumer.

Ula ai nuksa ruh iaka 17 tylli thong ka United Nation ne ka Sustainable Development Goals (SDG) bad ka ri India ruh ka buh iaka juh ka thong ban iakhun iaka jingduk jingkyrduh, ban lait na ka jingiap thngan, ka bha ka miat haka pule ka puthi, ban don ka jinglong iaryngkat kyrdan, ba u nongshong shnong un ioh iaka umbam um dih kaba biang, ban pynbha iaka mariang nalor kiwei kiwei.

Shuh shuh u ma Sumer ula ong ba ka Statistics ai iaka jingkhein kaba thikna iaka roi ka par jong ka mynnor, mynta bad ka lashai bad lyngba ka jingwad bniah ka iarap ban tei iaka jylla bad ka ri.

Kiwei kiwei kiba kren ki kynthup ia u Ma TL Shullai District Statistical Officer, West Jaintia Hills, u Ma C Buam District Statistical Officer, East Jaintia Hills bad iaka kyntien pdiang la ai da u Bah TK Sawian primary investigator, ka jingkren ai khublei da u Bah P Syiemlieh.

La sam ruh iaki khusnam sha ki khynnah skul kiba jop haka jingiakop Elocution (Speech) bala pynlong da ka ophis u District Statistical Officer.

Ki nongjop kilong kine harum:

1st prize- Miss Arda-emiwaka Jones Latam
Ches’ Star Higher Secondary School Jowai

2nd Prize- Miss Riba Nylla Shylla
Government Girl’s Higher Secondary School Jowai

3rd Prize- Miss Ibapynhun Lamare
Q.C. Springside Higher Secondary School Jowai

3rd Prize- Miss Banda-ika Lyngdoh
Kiang Nangbah Government Higher Secondary School Jowai