Rakhe National Unity Day ka KVK Jaintia Hills da kaba ai jinghikai rep jhur tlang bad ri jingri

Syllad | The Rising MeghalayaOctober 31, 2020

Ka ophis Krishi Vigyan Kendra (KVK) Jaintia Hills ka la pynlong ia ka jinghikai online (webinar) haka jingrakhe iaka sngi kyrpang Jingiatylli Ka Ri kaba la tip kum ka National Unity Day mynta ka sngi na ka bynta ki nongrep jong ka Jaintia Hills halor ka rukom rep jhur tlang, ka rukom rep tit, ka rukom ri syiar bad ki skim bapher bapher jong ka sorkar.

Ia kane ka prokram la pyniaid da u Dr. Rimiki Suchiang, SMS (AH & Vety).

La plie ia kane ka prokram da u Dr D. Pasweth, Senior Scientist and Head KVK Jaintia Hills. La iashimbynta lang da kaba pule iaka kular jong ka sngi jingiatylli ka ri (Rastriya Exta Diwas Pledge).

Iaka jinghikai halor ka rukom rep jhur tlang la ai jinghikai da ka kong Banylla Kharbamon, SMS (Horticulture).

Ka la ai jingmut ruh ia ki nongrep ba kin thung jhur tlang ha ki ing ba la tap da ki plastic (walk in tunnel) ban iada na u thah bad ka jingkhriat. Kala batai ruh ia ki nongrep ba kin ym ieh shrah ia ki hali kba hadien bala dep ot ia u kba hynrei ba kin pyndonkam ia ki ha kaba rep jhur tlang.

Ia ka rukom rep tit pat la ai da Ka Kong Risakaru Lyngdoh, SMS (Agronomy) kala batai shaphang ka rukom rep tit, bad kiei ki jingdonkam haba rep tit bad ka jingmyntoi kaba ioh na kaba rep tit.

Ia ka rukom ri syiar la ai da u Dr Rimiki Suchiang, SMS(AH & Vety) u la kyntu ia ki nongrep ban shim ia kane ka kam ri syiar kum kalad ban kamai bad ruh ban pyndap ia ka jing donkam kham tam ia ka pylleng bad ka doh ha ka jylla.

Ka Kong Alethea Dympep, SMS (Extension) kala ai halor ki skim bapher bapher jong ka sorkar, Meghalaya na ka bynta ka jingmyntoi ia ki nongrep,

Kala batai shaphang ka Kisan Credit Card skim(KCC) ka dei ka skim ba pynioh loan iarap pisa ia ki nongrep, ka Agriculture infrastructure scheme, Micro Processing Unit Scheme. Ka la ai ruh ia ka jingpyntip ne awareness kumno ban ioh jingtip bad batai kumno ban ioh ia kine ki skim. Ka la don ruh ka Farmers Scientist Interaction hapdeng ki Scientist jong ka Office KVK bad ki nongrep.

Ka jingthmu jong ka prokram ka long ban ai jingmyntoi ka ba khraw ia ki nongrep ha kum kane ka por khangdam.