Rakhe National Voters Day ha WJH, u Amsa u nongmihkhmat ki PWDs haka election MLA 2023

Syllad | The Rising MeghalayaJanuary 25, 2023

Ka West Jaintia Hills District kala snohktilang bad ka ri baroh kawei ban rakhe iaka 13th National Voters Day, ne ka sngi kyrpang ban khring bad pynshlur iaki samla samhoi ne ki nongthep vote thymmai ban shimbynta ka jingjied iaki nongmihkhmat.

La rakhe ia kane ka sngi kyrpang ki nongthep vote ha JNV Mukhla haka sngi Balang bad mynta ka kynti ka bor synshar District kala jied ia u Amsa Freddy Khlem kum uwei na ki nongmihkhmat ki briew kiba don jingduna (Person with Disabilities).

Ka mat pdeng jong kane ka National Voters Day une u snem ka long “Nothing like Voting, I Vote for sure”.

U Deputy Commissioner Bah BS Sohliya, ki Additional Deputy Commissioners ma MA Challam, kong EL Warjri bad ka kong HML Kynta bad ki Extra Assistant Commissioner u S. Phanbuh bad Wankharw K Kharbuli kila iadonlang haka jingialang.

U DC haba kren ula kyntu iaki samla kiban ioh thep vote nyngkong ban shimbynta shitrem ha kane ka election kaban long haka 27 tarik u Rymphang.

Ula ong ruh ka shimbynta haka jingthep iaka vote kan pynkhlain bad pynim iaka synshar paidbah ha kane ka ri kaba ngi shong sah bad ka hok thep vote (Right to Vote) ka dei ka hok jong uwei pa uwei u nongshong shnong u/ka bala dap iaka rta kaba 18 snem shaneng kaba la pynskhem ruh da ka iingbishar ba hakhliehduh ka ri Supreme Court.

Ha kane ka sngi u DC ula sam Electoral Photo Identity Card (EPIC) sha ki 24 ki nongthep vote thymmai ka shnong Mukhla.

U Ma MA Challam ula pynkup burom ruh ia u nongmihkhmat ki briew ba don jingduna u Amsa Freddy Khlem. U sama Amsa ula kyntu ia baroh ki paralok kiba don jingduna kum ma u ban shim bynta shitrhem ha kane ka election

U Bah W Kharbuli ula ialam ia ki paidbah bad ki nongthep vote thymmai ban pule iaka jingkular (pledge).