Rakhe Swachhata Hi Seva Campaign ha East Jaintia Hills; Plie ka Santa Mary Shylla ia ka Waste Recovery Centre ha Latyrke

Syllad | The Rising MeghalayaSeptember 24, 2024

Ka District Swachh Bharat Mission (Gramin), East Jaintia Hills District shi bynta ka jingrakhe ia ka Swachhata Hi Seva Campaign 2024 ka la pynlong da ka prokram thung  dieng bad jingpynshai paidbah halor ka ‘Waste Recovery’ ha ka jingialang ba la pynlong haka 24 tarik Nailur ha Latyrke Community Hall, Latyrke, East Jaintia Hills District.

Ka MLA ka Sutnga-Saipung ka Kong Santa Mary Shylla ka la ia don lang ha kane ka prokram kum ka Kongsan ha ryngkat u Deputy Commissioner, East Jaintia Hills, u Shivansh Awasthi, Executive Engineer, Electrical Division, Jowai cum Member Secretary, District Swachh Bharat Mission (Gramin), Bah Paul Synnah, ki heh sorkar, ki nongialam shnong bad kiwei kiwei.

Na ka liang ka Kongsan ka la plie paidbah ruh ïa ka Waste Recovery Centre ne ka jaka pynkhuid iaki ñiut kiba lah ban pyndonkam biang ha ka Shnong Latyrke bad ïa ka kamra klas ba pynkha thymmai jong ka Latyrke Secondary School.

Ha ka jingkren kum ka Kongsan ka Kong Santa ka la ïaroh ïa ki nongshong shnong ka Latyrke halor ka jingiatreilang ka jong ki ban pynsuk ïa ka jingpyndonkam ïa ka pisa jong ka DMF fund bad ban pynlah ban pyndep ïa ki ar tylli ki projek ba la plie paidbah ha kane ka prokram kata, ka jingtei ïa ka Waste Recovery Centre bad ka kamra klas jong ka Latyrke Secondary School.          

Haba kren halor ka jingdonkam ban tehlakam ia ka jingjaboh, ka Kong MLA ka la pynshai ruh halor ka jingnangkhluit jong ka pyrthei bad halor ka jingdonkam ban thung dieng bad ban shim khia ha ki jingpyrshang ban pynneh pynsah ïa ka mariang bad ban long ka nuksa kaba bha ïa ki pateng ban wan.

Nalor kata ka Kong Santa ka la iai ban ruh halor ka jingdonkam jong ka jingkhuid jingsuba ym tang ha la ki jong ki iing ki sem, hynrei wat ha ka imlang sahlang ruh, kata da kaba kyntu ruh ia ki ban pynphriang ia ka jingsngewthuh sha kiwei pat halor ka jingdonkam ia ka jingkhuid jingsuba bad ban tehlakam ia ki jaboh jabaiñ ha ka jingim kaba man ka sngi.

Na ka liang u Deputy Commissioner ha ka jingkren u la ai khublei ïa baroh ki nongshim bynta na ka bynta ban pyndep hok ïa kane ka Recovery Centre.

Ha kajuh ka por u la pyntip ruh ba la plie paidbah ïa ka Swachhata Hi Seva ryngkat ka jingïohi jngai jong u Mahatma Gandhi ban pynlong ia kawei pa kawei ka shnong kaba khuid bad ruh ban kyntiew ia ka ioh ka kot ha ki thain nongkyndong.

Kiwei pat kiba la ai jingkren ha kane ka prokram ki kynthup ïa ka District WASH (Water, Sanitation and Hygiene) Co-ordinator kong Embhah Rymbai, ka Patricia Law Co-ordinator ka Jal Shakti bad u District Co-ordinator, District Swachh Bharat Mission (Gramin), EJH u Damonlangki Dkhar.