Rakhe World Aids Day ha East Jaintia Hills

Syllad | The Rising MeghalayaDecember 2, 2023

Ka ophis jong u District Integrated Strategy for HIV/AIDS (DISHA), Khliehriat ha ryngkat ka jingïatreilang bad ka Mihmyntdu Community Social Welfare Association, kumjuh ruh ka Targeted Intervention Counselling Centre (MCSWA, TI CC), ka Chankylliang Development Society (CKDS-LWS), OST Centre, Khliehriat,  AHANA, VIHAAN ha ryngkat ka jingkyrshan lang ka tnat  jong ka Project Director, Meghalaya AIDS Control Society (MACS), Shillong bad ka District Legal Services Authority (DSLA), East Jaintia Hills District ki la rakhe iaka World Aids Day ha Community Hall Dkhiah East haka sngi Thohdieng.

U Public Prosecutor, District and Sessions Court, East Jaiñtia Hills District, u bah S Pdang haba kren kum u kongsan u la ai ka jingkhublei ia ka District Integrated Strategy for HIV/AIDS (DISHA), bad ka MCSWA kiba la trei shitom bad pynurlong ia kane ka prokram  kaba iadei bad ka jingpang HIV/AIDS kaba wanrah ruh ia ka jingiashim bynta lang ki paidbah kiba na ki shnong bapher bapher.

Ha ka jingkren u la pynpaw ruh ia ka jingsngewkhia halor ka jingshim sting ki briew namar ba kim don ka mon ban leit sha ki jaka test bad test ia kane ka jingpang la ka don ne em ha ka met jong ki, kane ka jingshim sting lehse kam buh jingma ia ka imlang ka sahlang baroh kawei.

Nalor kata u la ong ruh ba kane ka jingpang ka don ki lad ban iada ban lait na ka jingsaphriang u khniang jingpang lada ki briew ki shim ka jingiatreilang bad ki tnat lane ki agency kiba dei peit, u kyntu ia ki paidbah ba ki dei ban mih shakhmat ban phah test.

Iakynduh jingeh ka jylla namar ka jingdon 8384 ngut kiba im ryngkat jingpang HIV

Kumjuh na ka liang u District Medical & Health Officer, East Jaiñtia Hills District, u Dr D.Shylla, u la batai kham bniah shaphang ki centre kiba don hapoh ka district kiba lah ban ai ka jingshakri ia kito kiba la shah ktah ha kane ka jingpang, ha ki centre lah ioh ban ioh ia ki jingiasyllok lem bad ki lad jingsumar, u la ong ruh ba ïa kane ka jait jingpang lah ban tehlakam dei tang da ka jingiatreilang..

Kiwei kiwei kiba la ai jingkren ha kane ka prokram ki kynthup ruh ka kong Rinibeth Patlong, kaba dei ka Program Manager, Mihmyntdu Community Social Welfare Association (MCSWA), ka kong Philia Paslein, kaba dei ka Counsellor, ICTC Khliehriat u, Dr. J Nongtdu, M.O, Opioid Substitution Therapy (OST) Centre, Khliehriat, ka kong  Nisha Rynniaw DMDO, DISHA Khliehriat, u bah W Dohling, DD, Prevention Division, Meghalaya AIDS Control Society (MACS), Shillong bad kiwei.