Rakhe World Environment Day ka Thomas Jones Synod College

Syllad | The Rising MeghalayaJune 7, 2019

JOWAI: Ka Thomas Jones Synod College, Jowai lyngba ka Extension Activities Committee kala rakhe ïaka World Environment Day (WED), kaba matpdeng ka dei ‘Air Pollution’ haka sngi Thohdieng.

Naduh u Executive Secretary KJP Synod Mihngi U Pastor E Sanglyne, U Principal Thomas Jones Synod College u Dr. RR Kharkongor, ka Kong RM Khonglah Coordinator Eco Club, Thomas Jones Synod College bad ki samla pule ka kolej kila iasimbynta haka jingthung dieng.

La thung iaki jait dieng Cherry bad Champa haduh 100 tynrai ha ki jaka jong ka kolej.

Kong RM Khonglah Coordinator Eco Club, haba kren haka jingialang kaba lyngkot kala ïathuh ba ïa ka WED la rakhe da ka United Nation kaba la sdang ban rakhe naduh u snem 1974 halor ka nongrim bad ka thong ban pynneh pynsah iaka mariang.

U Dr. RR Kharkongor haba kren ula banjur ban ïakhun pyrshah ban jop iaka jaboh plastik bad ula ong ba ki samla pule ki dei ban long ki nuksa ha kaba kin kiar ban pyndonkam iaki plastik haka jingim jong ki manla ka sngi bad ban hikai ïa u nongshong shnong haka juh ka por iaka jingsniew ka platik ban jop iaka jaboh plastik.

U Rev. E. Sanglyne Executive Secretary KJP Synod Mihngi haba kren kum u kongsan, ula ong ka mariang ka long ka kmie bad ma ngi ki khun bynriew ngi long ki khun kiba im bad sah haka jingkdup jong ka kmie kaba long ka Mei mariang bad lada ngim sumar ïada iaka baroh ki jingthaw ba im kin shah ktah.

Ula ong kiba bun ki ri haka pyrthei shimkhia bha ban sumar iaka mariang da kaba thung shibun ki dieng bad ban sangeh ban pynjot pathar iaka mariang, namar ki sngewthuh ba lada khlem ka mariang u khun bynriew ruh un nym don jingim.

Ha kane ka sngi la sam khusnam ruh sha baroh ki samla pule ka kolej kiba la iashim bynta ha ka jingiakop Painting Competition kaba la pynlong ha ka 6 tarik Jylliew.