Rakhe World Environment Day ki khynnah skul Chilliangraij bad ka Art of Living Jowai

Syllad | The Rising MeghalayaJune 6, 2019

JOWAI: Ka bor pyniaid jong ka skul bad ki khynnah skul jong ka Chilliangraij Jowai ruh kila shimbynta haka jingthung dieng haka World Environment Day bad jurip ruh ïaki dieng kiba la dep thung ha ki snem kiba la dep haka shnong Chilliangraij, Jowai.

Kum ban pynsngewthuh ia ki khynnah shaphang kane ka sngi na ka liang Ka kong Handakaru Iakai, Head Teacher ka la shim ban ai jingkren halor ka mat pdeng jong kane ka sngi kaba ong Beat Air Pollution.

U DH Pde, Chairman School Managing Committee u la batai halor ka jingdonkam jong ka jingthung ia ki dieng ki siej na ki por sha ki por kaba long shibynta ban pynlait ia ka mei mariang na ka jinglong syllen.

Shuh Shuh ruh ha kane ka sngi ha ka thong jong ka Swachh Bharat-Swachh Vidyalaya la ioh ruh ka jingpule ia ka Swachh Bharat Pledge kaba long kum shibynta ban pynkynmaw ia ka kamram kum ki nongshongshnong ha ka jingiadei ban wanrah ia ka jingkhuid jingsuba ki sawdong sawkun ka mei mariang.

Ha ka juh ka sngi ka Dorbar Shnong Chilliangraij kum shibynta ban leh burom Centenary Celebration jong ïung Walieh ryngkat ka Art of Living West Jaintia Hills ki la pynlong ia ka jingthung dieng kaba la iashimbynta da ki khun ka shnong bad ki dkhot ka Art of Living, West Jaintia Hills.

U Damehiwot Pde, Rangbah Shnong haba ai jingkren ha ka jingiadei bad kane ka sngi u la ong ka jingthung ia ki dieng ki siej na ki por sha ki por ka long kaba donkam khnang ba ka mei mariang kan lait na ka jingsyllen bad ruh ka jingdon jong ki dieng ki siej ka wanrah ha ngi ia ka lyer bakhuid ba pyngngad.

U Kamnipaia Challam pat kum uwei na ki dkhot ka Art of Living, u ong kiei kiei baroh ki jingdonkam ngi ioh na ka mei mariang kumta kum ki pateng ngi dei ban don ka jingkitkhlieh na ka bynta jongka khnang ba ki tyllong um kroh umkrem kin iai tuid bad iai mih na ka pateng sha ka pateng.