Rakhe ‘World Health Day’ ka Ladthadlaboh UPHC, pynshai halor ka jingpang klongsnam, bampong, shini bad stroke

Syllad | The Rising MeghalayaApril 23, 2019

JOWAI: Ka Ladthadlaboh Urban PHC kala rakhe ïaka “World Health Day” ban pynshapriang ïaka khubor halor ka jingkongsan ka koit ka khiah jong uwei pa uwei bad kumno ban ïakhun ïaki jingpang klongsnam, bampong, shini bad stroke kiba la kynrei bha mynta namar ka rukom im bad ka rukom bam kaba khlem phikir.

Ka phang pdeng ka ‘World Health Day’ kalong ‘Universal Health Coverage Everyone Everywhere’ bad la pynlong ia kane ka prorkam ha Lumpariat Jowai haka sngi ba Ar haka jingïalang kaba pyniaid da u ma Joseph Khonglah Waheh Shnong barim ka Lumpariat.

Ka Dr. Helen J Uriah Specialist (Public Health) District Surveillance Officer haka jingkren maitphang halor ka World Health Day bad ka jingpang bym ia bit kaba tip kum ka Non communicable Disease (NCD), ki jingpang bala kynrei bha ha kylleng namar ka jingpyndonkam ïa u duma, ka kyiad, ka rukom im ka rukom bam ïaki jingbam khlem da phikir bad khlem kilan met kaba ktah iaka koit ka khiah u briew.

Kine ki jingpang bym ia bit naduh ka jingpang klongsnam, ka jingpang shini, ka cancer (bampong) bad ka stroke kala ktah bha ïa ki briew haka rta kaba 30 haduh 69 snem.

Katkum ka kaiphod ka WHO (World Health Organisation) ka jingiap ki briew na kane ka jingpang kala nang kiew bad bunsien hi kane ka ktah haki longiing kiba duk bad ki ri duk..

Ka sorkar pdeng ban iakhun ia kane ka jingpang bym ia bit kala sdang iaka National Programme for Prevention and Control of Cancer Diabetes Cardio Vascular Diseases and Stroke (NPCDCS) bad kino kino ki nongpang ban ioh ka jingsumar kin ioh ki jingsumar haki Health & Wellness Centre kiba don ha man la ki shnong bad jaka.

Kiwei kiwei kiba ai jingpynshait ki kynthup ïa u Dr. A Hinge Medical Specialist District, Hospital Ialong, Dr. S. Sumer Gyneacologist District Hospital Ialong bad la ioh ka jingkren pdiang na ka Dr JN. Shullai kaba dei peit ïaka Ladthadlaboh Urban PHC.