Rakhe World Oral Health Day ha Ummulong

Syllad | The Rising MeghalayaMarch 20, 2019

JOWAI: Ka tnad ka koit ka khiah jong ka West Jaiñtia Hills District kala rakhe ïaka ‘World Oral Health Day’, kaba ka phang pdeng ka dei “Say Ah! Act on Mouth Health” ha phyllaw jong ka Ummulong CHC haka sngi Balang.

La pynïaid ïa kane ka prokram da ka Dr. Rebecca Laloo Dental Surgeon NOHP, Ummulong CHC haka jingiadonlang ka kongsan ka Kong Rica Bareh CDPO, Thadlaskein Block, Dr. M Lamare Sr. Medical Officer Incharge Ummulong, ki nonghikai bad ki khynnah skul bapher bapher ka Ummulong.

Ka Dr. B. Marboh Dental Surgeon, Jowai Civil Hospital Ialong haka jingkren maitphang ka la iathuh ba ia ka World Oral Health Day la rakhe nyngkong eh haka 20 tarik Lber jong u snem 2013 halor ka thong ban pynsngewthuh ia uba bun balang halor ka koit ka khiah ki bniat bad ki bynta ba shapoh ka ktien.

Ka Dr. E. Garod Senior Dental Surgeon, Nartiang PHC kala batai pynshai shaphang ki jait jingpang ba lah ktah iaka met u briew lada ym lehkhuid ne pynkhuid bha iaki bniat khamtam haki khyllung khynnah kumjuh ki rangbah. Naki jingpang bniat har rukom ki jingpang la ban ioh kum ka stroke, ka jingpang klongsnam, shini. Ka ktah ruh ïaki longkmie haba armet haka kha ka pun.

Ka Dr. Garod kala ong ba dei ban pyndonkam tang 3 bnai uwei u brut kynshut bniat. La kyntu ban lehkhuid ïaki bniat bad ka ktien ban ioh ka met kaba koit ba khiah.

Ka kongsan Kong Rica Bareh haba kren kala ong ban kiar ïa ki jingbam bym tei kum ki chips, chocolate bad kiwei kiwei ki jingbam ba thiang. Kala kyntu ki khynnah kiban heh ban san ban bam da ki jingbam ba tei kum ki soh ki pai, ka dud ba pynbha ïaka bniat bad ruh ka koit ka khiah bad ban pynmlien ban kynshut bniat ar sien shisngi haka por mynstep bad shuwa ban thiah.

Hashwa katei ka la don ka jingiaiaid Rally ba la iashim bynta da ki khynnah skul bapher bapher ka Ummulong ban pynsngewthuh sha u paidbah halor ka jingdonkam ban ioh sumar bha ïaki bniat bad ka ktien.

La sam khusnam ruh sha ki San ngut ki khynnah kiba la ioh iaka nam Best Slogan Award ba kynthup ia u Deiwyrai Laloo na ka skul Presbyterian Ummlong, Ritreki Kharpampiah na Litter flower, Andyson Suting na Church of God, Rilem Lyngdoh na Iawpynsiñ UP bad Katdame Shylla na Lummynso UP School.