Rakhe World TB Day ha Jowai

Syllad | The Rising MeghalayaMarch 25, 2023

Ka District Health Society, West Jaiñtia Hills lyngba ka National Tuberculosis Elimination Programme ka la rakhe ïaka World Tuberculosis Day haka sngi Thohdieng.

Ka phang pdeng kane ka prokram ka long “Yes we can End TB” ne Haoid ngi lah ban pynkut ïaka jingpang TB.

Ïaka jingïalang la pynlong ha Khimusniang Indoor Hall Sports Hall, Jowai haka jingdonlang ka kongsan ka Kong H.M.L. Kynta, MCS, Additional Deputy Commissioner jong ka West Jaiñtia District, ki khynnah skul bad ki nonghikai na ki skul bapher ka District haka jingïalang kaba la pynïaid da u Pynkhreh Susngi DPC-NTER.

Ka Dr. I. Khyriem Senior Medical & Health Officer, DTC, Jowai haba kren halor ka phang, ka la ong ka jingpang TB kadei ka jingpang kaba tip kum ka ‘silent killer’ bad kadei kawei naki jait jingpang kaba ma lada ki paidbah kim sumar bad phikir haka por kaba biang bad ka lah ruh ban lam sha ka jingïap.

Ka la ïathuh ba haka pyrthei baroh kawei, ka jingïap jong ki briew na ka jingpang TB haka shisngi ka kiew sha ka 4400 ngut bad kiba ngat ïaka jingpang TB haka shisngi ka kot sha ka 30 hajar ngut.

Shuh shuh ka la ong, ka sorkar India lyngba u Myntri Rangbah duh ka ri u Narendra Modi ka la sdang ïaka prokram kaba la tip kum ka National TB Elimination Programme halor ka thong ban rat dyngkhong ïa kane jingpang la kumno kumno ha u snem 2025.

Ka Dr. Khyriem ka la pyntip ruh ba ka sorkar pdeng ka pynshlur ïaki riew shimet, ki kompeni, ki nongmihkhmat paidbah, ki balang bad ki niam, ki sengbhalang ne seng trei mon sngewbha ba kin wan shakhamat ban ting (adopt) ïaki nongpang TB ha kaba kin ïarap ïa kine ki nongpang ba ki ting ban ai da ki jingbam tei met tad haduh ba kin da koit pura na kane ka jingpang.

Ka Dr. EBV. Laloo District Tuberculosis Officer, Jaintia Hills ka la ong, kane ka jingpang kadei kaba la don bun snem hynrei naka liang ka tnad ka koit ka khiah bad ka kynhun ki doktor haduh kine ki sngi ki dang ïakhun pyrshah ïa kane ka jait jingpang ban pynduhjait ïaka.

Ka la batai shai ruh kumno ka jingpang TB ka saphriang bad kumno ban sumar ïaka bad ki paidbah kim dei ban kheiñ sting hynrei ban sumar bad leit sha ki jaka sumar ba hajan eh jong ki namar ka sorkar ka ai ei ïaka jingsumar, ki dawai ban dih ban pynkoit ïa kane ka jait jingpang. Ka la pyntip ruh ba ha TB Centre ha Jowai la don ka CB-NAAT Test bad ka Microscopic Examination.

Ka la batai ruh ïaki ar jait ki jingpang TB kiba kynthup ïaka Pulmonary kaba ktah ïaki tor bad ka Extra Pulmonary TB kaba ktah ïaki shyieng bad kiwei kiwei ki bynta jong ki dohjem.

Ka la batai ruh ïaki dak ki shin kiba paw, ïaki rukom ai jingsumar bad ïa ki lad jingïada. Ki dak ki shin kiba paw haba ki briew ki ngat ha ka jingpang TB kadei ka jyrhoh kaba neh ar taïew kynthih bad palat ïa kata, ka jingkhie shit, ka jingmih syep mynmiet bad ka jinghiar ka jingkhia. Ka jingpang TB ka ktah ruh ïa ka met baroh kawei hynrei lait noh tang ïa u shñiuh bad ïa ki tyrsim.

Ka Dr. Laloo ka ai ruh ka khubor kaba shai ba ka jingpang TB kadei ka jingpang kaba lah ban pynkoit bad ka la ban jur ruh ïa kito kiba ïoh ïa kane ka jingpang ban tista ïa ka jingdih ïaki dawai kumba la bthah da ki doktor khnang ban lah ban teh lakam ïaka jingphriang jong ka.

Shuh shuh Dr. Laloo kala pynshlur ïaki khynnah skul bad ïaki nonghikai bad kin pynshai sha ki ba haïing hasem bad sha ka imlang ka sahlang khnang ba kin dup ïoh jingtip kumno ban ïada ïalade na ka jingpang TB.

Ka Kong HML Kynta haka jingkren ka la ban jur ïaka jingdonkam ban ïatreilang khnang ba ka jingthmu ban rat dyngkhong ïaka jingpang TB napoh ka Jylla Meghalaya bad ha ka ri ha u snem 2025 kan long kaba jop.

Ha kane ka sngi la ïoh ruh ïaka jingkren na ki arngut kiba la koit na ka jingpang TB ha kaba ki ïathuh ïa kaei kaba ki ïakynduh ha ryngkat ka jingkyntu kynpham ïa kiba ïoh ïa kane ka jingpang ban kohnguh ïaka jingbthah ki doktor khnang ba kin ïoh ïaka jingkoit na kane ka jingpang.

Ha kane ka sngi la sam khusnam ruh sha ki khynnah skul kiba la shim bynta haki jingïakop thoh placard, drawing, sports ba la shim bynta da ki khynnah skul bad kum ka jingai mynsiem la sam khusnam ruh sha ki nongtrei Asha bad nongtrei ka tnad ka koit ka khiah kiba la trei shitom ban ïakhun ïaka jingpang TB.

Hashwa kane ka la don ka jingïaid rally ki khynnah skul kaba sdang na madan Daimasi, Ladthadlaboh haduh Indoor Sports Hall, Khimusniang.